تحشم حثال العرب من شان طيبها

[سهاج]

(( تحشم أحثال العرب .. ))



البارحه قامت افكاري تناوبني=من هاجسٍ بالضماير قام يجذبها
بيبان الاشعار لامن ضقت تندبني=اكتب بعضها وبعض حروف مكتبها
ياراشد الوقت يا مشكاي مرّعبني=احسب الايام واغضي عن مصايبها
أضيق من هاجسٍ دايم مصاحبني=سود اليالي تجرحني عقاربها
لو اشرح الوضع يمكنك تكذبني=بعض السوالف تحير فكر صاحبها
أسمع هروجٍ بعضها ما يناسبني=واقفيت عن كل مخطيها وصايبها
ياخوي بعض الهروج العوج تغضبني=الناس ما تتركك لوّك مجنبها
الحاقد اللي بليّا ذنب حاربني=ادري بناره ولو يخفي لهايبها
يمدحني ان جيت وإن قفيت عذربني=بعض البشر مهنته يوقد حرايبها
أهدي النفس لجل انه يجنبني=أخاف لا طالت السيره نخربها
ماهو صحيبي ولا ارضى انه يصاحبني=النفس عن مثله ارفعها واهذبها
اخاف من رفقت الخايب تخيبني=أحسب امورٍ بعضهم ما يحسبها
رفقة هل المعرفه والطيب تعجبني=وليا جهلت الامور إنشد مجربها
صديقي اللي ليا زليت عاتبني=وليا حفظلي سريره ما يهرجبها
هذاك بالطيب والمعروف يكسبني=وانا سناده ليا من حل واجبها
ياراشد أصلي عن المهياف ينتبني=بعض المواضيع مالي في طلايبها
صبري على اللي جرحني ما يعذربني=تحشم حثال العرب من شان طيبها
والله يلولا الحيا والحلم قاظبني=اني افضح السالفه واذكر سبايبها
لاشك ابصبر ولو الصبر متعبني=نفسن بلا صبر ما توفي طلايبها
أبديت واخفيت عنك أشْينْ تشاغبني=والله عليمٍ بحاضرها وغايبها


لشاعر / سعود الفهد المطيري