محاوره قديمه بين صياف و حبيب

[ماجد الشماسي]

صياف الحربي

جانا ببرنامـج حيـاة الباديـه شاعـر جديـد
يامرحبا باللي على درب الشرف سار اقدمـه
يالعازمي ليلن رمى بـك عندنـا ليلـن شديـد
لكن اظن الذيـب تـال الليـل يفتحلـك فمـه

حبيب العازمي

ماجاكـم الا خصمكـم والله يدبـر مايـريـد
واما القضا والحق يقضي فيه قاض المحكمـه
أنا حسبت حساب وقتي من قريب ومن بعيـد
واليا لقيت الذيب اسمي باسم ربـي وارجمـه



صــيــاف

حنـا رجـال ولا يخوفنـا كلامـك والوعيـد
ومن لايعرف العلـم بالعلـم الحديـث نعلمـه
تـراك لاذالحيـن ماعلمـت بالعلـم الأكيـد
اقلط على سبـع الخـلا يلزمـك ولا تلزمـه

حـبـيــب

انتـم رجـال وكـل رجـال يفيـد ويستفيـد
ماحدن يعلـم عالمـن يقـرا ويكتـب بقلمـه
ماخاف من سبع الخلا وانا معي سيفن حديـد
واللي يجي من تحت حد السيف الأبيض يقضمه


صــيــاف

ياكثر ماتجمع وتحسب مـار مـدري وش تصيـد
لاحضروا الكتاب طلع علمـك اللـي تزعمـه
ياكبر حظك لو حضرت العيد واليوم السعيـد
لكن حظك لو بنى لـك بيـت بكـره يهدمـه


حـبـيــب

انته تجاهلت الرسايل عقـب جاتـك فالبريـد
واليا دخلنا المعركـه مـن تقـدره لاترحمـه
ياكبر حظي وانت حظك قام ينقـص مايزيـد
واليا كحلت العين ابكحل نون عينـك والطمـه

[شاعر المعنى]

صياف :
يالعازمي ليلن رمى بـك عندنـا ليلـن شديـد
لكن أظــن الذيـب تـال الليـل يفتحلـك فـمـه

حبيب :
أنا حسبت حساب وقتي من قريب ومن بعيـد
واليا لقيت الذيب أسمي باسم ربـي وأرجمـه

الله يرحمك ياصياف والله يطول عمرك ياحبيب . فعلا" شعراء بمعنى الكلمة وأنا من أشد المعجبين بشاعريتهم الفذه والتي لن تتكرر طال الزمان أو قصر .

ولا أنسى أن أشكر أخي / ماجد الشماسي على هذا النقل المتميز وليس بغريب عليه لأنه دائما" مبدع والمبدع يستحق الشكر والتقدير . شكرا" لك أخي / ماجد وإلى الأمام .



أخوك / شاعر المعنى

[ماجد الشماسي]

لاهنت ياشاعر المعنى شهاده اعتز بها ومبارك عليك الشهر