موضوع مهم للغاية............؟!

[مشعل]

السلام عليكم

‎( ضربه كبيرة لسمعة نوكيا ‎)

لأن الموضوع جداً خطير ؟!؟

هذا الموضوع‎ صار لواحد اعرفه واليكم الموضوع :

‎كل اللي معاهم جوالات بكاميرا ومصور فيها صور عائلية

او البنات اللي يجون من برا و يصورون بعضهم بجوال الكاميرا خاصة في المناسبات العائلية الصغيرة يعني اقارب عيال عم او غيره ‎.

وبعده يمسحون الصور من الجوال ترا ما تنمسح نهائيا ‎!!!


وفعـــــــــــــــــــــــــــــــــــــلا هذا صار مع صاحبنا فقد قال لي :


انامعي جوال نو كيا ‎6600 وفجأة اشوف شاشة الجوال والقى كلام بالانجليزي وفيه ‎كلمة(ERROR ) يعني بالعربي خربان فقلت اروح لمحل زميلي عنده محل جوال في مجمع كبير.
‎ ‎
وقلتله يافلان وش السالفة قال جوالك يبغاله اعادة تهيئه يعني سفت وير من جديد يعني بيحملي اصدار الباندا من جديد.

قلتله الله يخليك الا الارقام ما حفضتها لا بذاكره ولا غيره فقالي لا يهمك احاول اسحبها لك ‎
المهم حط جوالي بتوصيلات عنده موصله بجهاز الكمبيوتر.

وبعد نصف ساعه حملي اصدار الباندا الجديد وقالي خذ رجعت لك الارقام
ما خليتها تروح مع التهيئة ‎ ..

وحمدت ربي... لكن تفاجأت لمن رحت للقائمة ورحت للاستديو ‎.

حصلت الصور الي انا مصور به عيال اختي في البر العيد الماضي والله صور كثيرة فوق الاربعين صورة

وانا كنت ما سحها من زمان ولا بقيت ولا صورة بالجهاز .

اندهشت وقلت له هذي الصور انا ما سحها قال ايه مو قلت لك ما ني مخلي ارقامك تروح قلت له ‎الحمدلله ارقامي رجعت بس معقولة الصور ترجع قال لي ايه ترجع ‎.. ‎.

وقالي ياعمي شوف هالمحلات كلهم يحترون بس بنت تجي ومعها جوال الباندا او اي جوال بكاميرا وتبغى له صيانة ينبسطون يقولي والله فلان الي بعد المحل الي جنبنا لاقي صور بجوال وحده له ولخواتها !!!!!!!!!!!

ويقول ومصوره نفسه وهي لابسة كذا لبس ‎.

قلت والله المسكينه الحين بتنتشر صورتها وصورة خواتها بالنت لو نشرها صاحب المحل ‎.....
وقالي غيرهم كثير......

[اخو شما]

الله يكفينا شر هالظاهره

فعلا الجوال الكامير مفاسده اكثر من محاسنه

على افتراض ان فيه ايجابيات ولكننا دوما ننظر للأمور من زوايا معتمه وضيقه

هذه الظاهره ستتسب في انهيار البيوت

وفضح نساء عفيفات طاهرات والتشهير بصورهن ظلما وبهتانا

شكرا اخي الغالي مشعل على التنبيه

وحفظنا الله واياك والمسلمين والسلمات من كل مكروه

[ولدالوجيرب]

اخوي مشعل انا سمعت ان الشرطه اذا لقته مع صادرته وصارت مع كم واحد


لكن ماني متأكد من الخبر



نعم اخوي مشعل الجوال ابوكيمراء


خطير جدا


حتى انه يستخدم في العراس


والحفلات ويقوم التصوير به فلو صورت احدى النساء ونشرت صورتها في النت على انها عاهرة فماذنب هذه المسكينه

[ولدالوجيرب]

تسلم يالغالي

[مشعل]

اخو شما
حياك يالغالي
وعلى قراءتك للموضوع
واحب ابشرك ان هذه المشاكل تأذوا الناس منها حتى الدول اللي تصنع فيها هذه الجوالات تأذو اهلها
على سبيل المثال كوريا صنعت جوال يطلع فلاش مع صوت ينبه اللي تبي تصوره وهو جوال سامسونج الجديد
اللي يسمونه راغب علامه...
وهذي الميزة جات بعد الشكاوي اللي قدمت للشركة.

تحياتي لك اخوي العزيز اخو شما
...........................

[مشعل]

هلا فيك اخوي ابن الوجيرب

كلامك صحيح مئة بالمئة
فيه قرار وصل جميع المنافذ عدم السماح لدخول هذه الاجهزة
كذلك اعرف واحد بالشرطة ويؤيد صحة هذا الخبر.

حياك الله اخوي الغالي ابن الوجيرب وعلى اهتمامك بالموضوع

.......................................

[بن براك]

السلام عليكم

الله يعطيك العافية أخي مشعل

على التنبية.

لكن لدي ملاحظة .....

وجوب تذييل مشاركتك بمنقوووول ...وإلا ظن القارئ بأنك كاتب الموضوع

أشكرك مرة أخرى على النقل المميز والهادف

بن براك

[رشاش السبيعي]

الله يكفينا شررر هذا الجهاز

[مشعل]

اخ ابن براك
ليش اكتب منقول وانا اللي كاتبه صحيح الكلام مقيول لي
بس انا صاحب الموضوع.


اخوي رشاش السبيعي
امين يارب العالمين
شكرا لمرورك الكريم

[رميص]

[جزاك الله ألف خير على هذا التنبية
وخصوصا ان جوالات الكاميرا اصبحت الآن موضة وتحدي بين الشباب والشابات .

............................ولكم تحياتي ...................:applaudit:thumbs_up

[المتكهرب]

مشكور ياخوي

خاصة يجيك هارجال الضعيف على نياته

ويصور زوجتة

وغيرة من افراد العائلة


ويلعبون في الصور اصحاب المحلات

ويتفاجاء بكرة ويلقى كل شي امامه

ولكن انصح كل واحد معة جوال الباندا

انة مايصور حريم ولا غيرة

تحياتي

[المولع]

ان المهبول اللي يروح يصور مرته والا بنته

انا صراحه مابعد جا معي هالجهاز ولا عندي نيه ادوره

لاهنت يامشعل

[مشعل]

اعزائي

رميص

المتكهرب

المولع

احيي الغيرة اللي عندكم

واقبلوا تحياتي

[ابن جـــــــراح]

الله يكفينا شر هالجوالات

فعلا نقلة صوره بشعه لاهالي الخليج العربي نسال الله العافيه
فاصبح اسهل وسيله للتصوير دون علم الآخرين
وها هو الآن يظهر وجهه الاسود مرة اخرى علينا من هالناحيه التي طرحتها يا مشعل

لا هنت على التنبيه
تقبل خالص تحياتي

[مشعل]

حياك الله اخي العزيز ابن جراح

وان شاء الدولة ماتقصر في منع دخول هذه الاجهزة

وفيه سالفة ودي اذكرها:

ان هناك صور عبارة عن مقاطع فيديو تشمأز لها الابدان متداولة بين الناس عن طريق جوال الباندا

والمشكلة انهم يقولون ان هذة المقاطع صورت في مدارس الثانوية بالسعودية

والصحيح انها في احدى دول الخليج -بدون ذكر اسمها- وابناء الخليج هم الذين اظهروا هذه الاشاعة

على السعودية ؟؟؟

[قاهر الظلام]

والله انها مصيبه.

متى نرى قراراً رادعاً في منع مثل هذه الجولات التي سلبياتها اكثر من ايجابياتها.

الأخ مشعل

الله يعطيك العافية على هذا التنبية الذي نرجو من الله العلي القدير ان يجعله في موازين حسناتك.

تقبل خالص تحياتي.

[مشعل]

الله يعافيك اخوي قاهر الظلام

ومشكور على ردك الجميل اللي يثلج الصدر

وحياك الله اخي العزيز

[بن براك]

السلام عليكم

عفوا أخي مشعل على تأخري بالرد ..

وذلك لعدم قرائتي للموضوع.

عموما أنا لم أذكر ذلك إلا لأن الموضوع واصلني من صديق عن طريق

البريد الألكتروني منذ شهر ونصف وهو متداول كثيرا لدى موظفيي ارامكو

بن براك

[مشعل]

شوف يابن براك

لاتقعد تلف وتدور

قول انك متضايق من ردي على موضوع شباب المملكة

وجبت طاري شباب الحسا

عموما حصل خير

واذا وجودي يضايقك او يضايق احد

انا طالع ومخليلك المنتدى اكتب فيه على راحتك

ولا ني قاطن وجهي عليك او على غيرك

اشوووووووووف اشغالي ابرك لي

سلاااااااااااااااااااااااااااااااااااااااااااااااا ااااااااام

.................................................. ....

[عديل الروح]

السلام عليكم ورحمة الله وبركاته .

شكراً أخي مشعل على التنبيه ، وطرح الموضوع ،

وأنا بعطي اللي عندهم هالجوال طريقة للتصوير سليمة ولا يمكن لمحلات الصيانة أن تطلع على الصور

والأولى عدم التصوير عموماً إلا لضرورة

الطريقة :
إذا دخلت على الكاميرا اضغط اختيارات _____ ثم ضبط _______ الذاكرة المستخدمة ___ اختر_____

( المومري كارد ) بطاقة الذاكرة . واحفظ صورك عليها .

وعند رغبتك في صيانة جوالك أسحب بطاقة الذاكرة كما تسحب شريحتك ، واحتفظ بالبطاقة في العلبة المخصصة لها

حتى لا تصاب بخدش فتفقد صورك .

وبهذا لن يستطيع أحد الإطلاع على ما قمت بتصويره .

أما الطامة الكبرى وهي تصوير الناس من غير علمهم ، واستغلال الصور لأغراض مشبوهة وحقيرة ، فهذه

حلها __________ يقظة الضمير .

أخي .. مشكور على الموضوع ،

[بن براك]

السلام عليكم

أخي الكريم ...مشعل

والله لا أعرف كيف ربطت أنت بين الموضوعين ..

عموما لقد راجعتهما فوجدت بأن ردي كان قبل تعليقك الظريف

ولا أرى شيء يسئ لك كون إني أقول بوجوب ذكر منقول او المصدر

لكي لا نضيع مجهود الكاتب.

والسلام

بن براك