حتى ابن دهيم العزّه يستحق وسام الملك عبد العزيز

[ابن عجيان]

بسم الله الرحمن الرحيم
زملائي أعضاء منتدى سبيع الغلباء
السلام عليكم ورحمة الله وبركاته ,,,,,,,,, وبعد

قرأت اليوم مصادفه في جريدة الرياض أن أحد أبناء شمر كرّم من قبل الملك عبد الله بن عبد العزيز بوسام الملك عبد العزيز من الدرجه الأولى
نظراً لأنه عفى عن قاتل إبنه من قبل أحد أبناء قبيلته

وقبل سنوات تنازل أحد أبناء قبيلة سبيع الغلبا عن ابن جاره القحطاني لأنه قتل إبن السبيعي إثر طعنه بالسكين في ظهره

وهذين الموقفين يحسبان لوالدي القتيلين رحمهما الله جميعاً
لكن ما دعاني أكتب هذا الموضوع
هو لماذا لم يكرم أيضاً السبيعي بوسام الملك عبد العزيز لقاء عفوه عن تنفيذ القصاص في ابن جاره
على الرغم من أنه لم يشفع له ولم يطلب له ديه أحد وإنما إكراماً لجاره تنازل عن ذلك

ومايزيد العجب أنه ذكر في جريدة الرياض أن هذه سابقه لم يقم بها أحد من قبل
ونفس الجريده نقلت الخبر السابق عن عفو السبيعي وسأحضر الروابط لكم

يجب علينا نشر هذا الخبر وتثبيته وبالنسبه لي يامحاتسيكم راح اتصل بزملائي من قبيلة العزه
والمفروض للأمانه أن قحطان يرفعون برقيه للملك بخصوص هذا الشأن


رابط موضوع الشمري بالأمس

http://www.alriyadh.com/2009/07/11/article443891.html#comments


وهذا رابط موضوع السبيعي عام 1427 هـ

http://www.alriyadh.com/2006/09/19/article187797.html

مع العلم أن عفو ابن دهيم عن قحطاني وهو من قبيله أخرى بينما الشمري من نفس القبيله

مانقول الا جزاهم الله خير جميعا وعفوهم يدل على شهامتهم ومروءتهم
لكن أيضاً من العدل أن يعطى فهد بن فراج العزه هذا الوسام أيضاً
وأتمنى أيضاً من أبناء سبيع إثارة هذا الموضوع ونشره هذا الخبر في المنتديات الأخرى


أبو نواف

[خيَّال الغلباء]

ابن عجيان جزاك الله خيرا ولا هنت

[ابن عجيان]

ابن عجيان جزاك الله خيرا ولا هنت


هلا وغلا بخيال الغلبا
وش لونك طال عمرك وبشرني عساك بخير ومن تحب؟


بيض الله وجهك على تثبيت الموضوع

هذا أولاً

الشيء الثاني ياخي اذا إنا يا أبناء القبيله لم نذكر فعايل طيب ربعنا وماننشرها ونؤيد تكريم من يستحق التكريم فمن يفعل ذلك

كتبت كلام طويل عريض بخصوص هالموضوع واسمح لي اقتبس أجزاء منه في ردي لك بعد إذنك



مافيه قبيله فزعت للدوله السعوديه مثل سبيع

على مدى تاريخها وبشهادة ابناءها والمؤرخين

وآخر من قرأت له الأمير خالد بن سلطان حينما ذكر هزيمة الترك وجلاءهم من نجد على يد سبيع

لكن بالرغم من هالشي القبيله مظلومه اعلامياً

بل حتى في مناصب الدوله

والله ماعلى القبيله قاصر لا من دكاتره ولا مهندسين ولا مثقفين ولا رتب عسكريه كبيره

ولو نشوف أقاليم أخرى مالها تاريخ مثل تاريخ سبيع لعرفت أن هذه القبيله مطلومه أيما ظلم



وللأسف أن المقربين من الأسره لم يقفوا مع إنصاف قبيلتهم

فبعضهم وأقولها بكل حرقة نظرته دونيه ومصلحته شخصيه ولا يهمه أمر قبيلته وأبناءها لا من قريب ولا من بعيد

أهم شي يحافظ على منصبه ومزاياه



ولا أريد التعميم فهو ظلم لأناس مشهورين بمواقفهم وكلنا نخبرهم



لكن اللي خلاني أقول هالكلام كلامك عن شمر

وش اللي يمنع إن المقربين من الأسره إثارة مثل هالموضوع مثل ماسوت شمر وتسوي غيرها من القبايل

نذكر كلنا فزعة خلف بن هذال لربعه يوم جا مزاينهم والملايين اللي جتهم عن طريقه لكن ربعنا لاحس ولا نس


ياخي انا ابي اعرف

ليش مايناقش مثل هالأمور في اجتماعات القبيله

وآخرها الإجتماع اللي صار بالرياض؟

ليه مايروحون لأحد كبار الأسره ويذكرون مثل هالمواقف؟



والله لو ان لي علاقه في الأسره او معرفه مايردني الا لساني

وين دور شيوخ القبيله بوجه عام



مثل هالموقف المفروض ان الشيخ ابن جفران أمير العزه يوصله للملك

الملك ماهوب راده لأنه عارف تاريخه وتاريخ العزه معهم

مداحمة الرجال هي اللي تجيب الحقوق
انا لو اني مسؤول ماني بكالف نفسي اذكر افعال القبيله او اكرمها تكريم يليق بها مادامها ماطلبت مني هالشي وألحت على ذلك


شوف اهل القصيم كيف خلوا ديرتهم منصى للاسره ومافيه أمير الا ويمرهم يسلم عليهم وتنشر في الإعلام والأخبار

وحنا الأسره بما فيها الملك الله يحفظه والملوك قبله رحمهم الله وهم كل سنه يخيمون في روضة خريم ولاحد جاب طاري إنه زار سبيع في رماح أو زاروه في مخيمه


وش اللي يمنع انه ينشر في الأخبار


والا حرام علينا وحلال على غيرنا؟


وأشكر لك مره أخرى تثبيت الموضوع وجاري الإتصالات بيني وبين ربعنا العزّه وللأسف إلى الآن مالقيت شي يبرد التسبد

وأقدر اجيب جوال ابن دهيم لكن ماهوب من طبع الرجال شرواه وشروى من يقرا انه يتبع معروفه من أو فضل

المفروض يكون التحرك من شيوخ العزه أو السبعان القريبين من الأسره أو حتى برقيه من القحطاني اللي عفى عنه ابن دهيم

أخوك

[بن قبان السبيعي]

ابن عجيان والله انك صادق

وكلامك سليم في المييه مييييه

وترى التكريم ماهوب من شيخ القبيله ؟؟ التكريم من الملك نفسه

يعني هذا لايحسب على القبيله عذي نقطه

اخوي لاتنسى بعد الهزاني وخويه الي الله العالم في القصيم الي انقذوا عايله من الغرق ؟؟

وين راحوا الجبور الي في الرمحيه يوم ظهروا الدوسري وعربه من موتره وهو في قلب السيل


والمشكله ان انت يالشمري وذا الثنين القصمان ظهروا لهم تكريم وظهروا باحسن صوره للعالم

وصار لهم تكريم على قناه الصحراء وتكريم ملكي زود على الوسام





السالفه فيها " إن "

وتقبل تحياتي اخيك سعد

وكلنا ابناء ديره وحده والخير والشر يمشي على الجميع ، يعني كرم ذا الشمري " السعودي" يكرم السبيعي " السعودي "

[بن قبان السبيعي]

عموماً الرجال مايبي مدح ولا ثناء ، فعله لوجه الله ، ويستاهل لتكريــم ،

[ابن عجيان]

عموماً الرجال مايبي مدح ولا ثناء ، فعله لوجه الله ، ويستاهل لتكريــم ،


هلا وغلا يا ابن قبان وبيض الله وجهك على ردودك

شوف وانا اخوك

يمكن ماقريت تعقيبي على مشاركة الأخ العزيز خيال الغلبا

لكن سبيع فيها ميزه وهذي تحسب لها
وهي ان السبيعي اذا سوى الجميل يسويه لوجه الله ويعتبر هالشيء عادي وهذي قمة الشهامه

وهذا اللي سواه ابن دهيم بيض الله وجهه ووجه من يقرا
وأخبر سالفة أهل الرمحيه مع العايله اللي ذكرتها في تعقيبك

لكن الشغله الآن فيها تضخيم لناس على حساب ناس آخرين أحق وأجدر
وما اقصد به هالموضوع بالذات
لكن أمور أخرى كل عاقل يعرفها


ياخي لو ان فيه رجال سوى له موقف مشرف وماحد جاب له طاري انا وش يدريني عن موقفه اللي سواه؟
مانيب داري لين يعلموني الرياجيل شوراكم

ويكون في علمك إن فيه صحفي شمري ثاني ذكر موقفه قبل اشبوع في جريدة الحياه تو مادريت عنه بعد اتصالاتي بخصوص هالموضوع
الرياجيل مستغلين الإعلام والعلاقات مع المسؤولين في رفع ربعهم وذكر فعل الطيب منهم
ونحن لم نعمل أي شيء على الإطلاق
هالشغله غير منطقيه ويجب أن نثيرها نحن أبناء القبيله

كلنا نعرف ناس كثيرين مقربين من الأسره وبينهم نسب أو خويا عندهم
ليه الرجال فيهم مايجيب طاري لمثل هالموضوع

ولو حطينا اساميهم يبي لنا موضوع ثاني عشان نذكرهم فيه وهم واجد ليه الواحد فيهم مايذكر رفيقه عندهم

[lion1430]

مشكور وما قصرت ولا هنت

[حزم الجلاميد]

مشكور وما قصرت ولا هنت

[خيّال العرفا]

مشكور وما قصرت ولا هنت