100الف وش المشروع المربح

[فهيد القريشي]

السلام عليكم ورحمة الله وبركاته


وشلونكم


يالربع معي 100 الف


وودي ادور لي مشروع زين


لانها بتحل علي بعد سنه يعني ارجعها للرجال اللي عطاني ايااها


وماقصر الرجال بيض الله وجهه يبني اشغل نفسي بدل من هالسلتحه


المهم


وش المشروع الزين اللي يدخل علي ارباح ؟؟

[admin]

مؤسسة مقاولات


خصوصا مشاريع الفلل وقروض صندوق التنمية العقاري كثيرة هذه السنة بالخرمة ومناطق المملكة



ربحان ربحان بس تعيصب و نفذ عن ذرعانك وخذ لك خيزران للعمال



بالتوفيق

[فهيد القريشي]

ارحب


ياليت تفهمني كيف مؤؤسسه مقاولات

وكم تكلف علي


البيت ابنيه باكثر من 300 الف


وانا ماعندي الا 100 الف ياليت تشرح لي وانا اخوك

[فهيد القريشي]

الوووووووووووووووووووووه

[ماهرأل سويلم]

يا أخ فهيد دور لك شخص ثقه طالع له قرض من صندوق التنمية من قريب وقيمته 300الف ريال وأعط صاحب القرض من 30 الى50 الف ريال وممكن أقل حسب تعاملك مع صاحب القرض وأتفق أنك تاخذ القرض منه مقابل القروش اللي بتعطيها له مقابل يكتب لك في ورقة تنازله عن البيت بقيمة القرض والسعي وقيمة الارض اللي بتشتريها وتحط شرط جزائي ب100الف في حالة تراجعه عن البيع ويكتب هذا العقد عند محامي وشهود ثقه...وألله يوفقك..

[الهداد]

اخي الكريم ماهر السويلم

ما ذكرته من طريقة ليست استثمار بل شراء وبيع.. والبيوع كما هو معلوم ان كانت بالذهب والفضة او ما يعدلهما كالعملات تخضع للتقابض و المثلية (مثلا بمثل)

وفي حالة شراء الدين لايخلو من ان يكون لايزال نقودا وهذا ما يظهر قالشرطان منتفيان وهنا يتحقق الربا بصورتيه الفضل والنسيئة
واما ان كان البيع واقع على بيت او سيارة اشتراها المقترض بالقرض فهنا مسألة اخرى وهي التورق فيقع البيع ولكن لايزال الدين متعلقا بذمة المقترض.
اما كنت تقصد شراء الدين او بيع الدين فالذي اعلمه انه محرم لانعدام التقابض

والله اعلم

[ماهرأل سويلم]

ألله يثيبك ياخوي يالهداد أنا قصدي يبني له بيت كادبلكس ويجره وتخيل أقل دبلكس قيمته كاأيجار سنوي مايقل عن 50الف ريال بالسنة فمابالك لوأذا عندوه أثنين 100ألف بالراحة وغير أذا فكر يبيع البيت؟؟

[فهيد القريشي]

يالربع انا مافهمت البيت يبي له اكثر من 500 الف


المهم واحد عطني راي


المهم يقول

تعطي اي واحد 5الالف وتحسبها له 10 الالف

بس قلت هذا حرام


قال ماتعطيه فلوس مافلوس

تبيع له قلم وتحسبه عليه بت10 الالف ريال هل هذا يجوز او لا ؟؟؟؟

[الهداد]

اخي الكريم فهيد..
اسرع طريقة واكثر طريقة فعالية هي التجارة وبما ان المبلغ يستحق عليك بعد سنة فلابد من طريقة سريعة لتحصيل المال وبما ان الربيع والضحية على الابواب تقدر تبدا بالغنم تشتري جملة وتبيعها قطاعي وما تكلفك غير اجرة السوداني والنقل ولانت بالش فيها عقب بيجيك الربيع بحول الله وتلقى لها سوق

وفكرة المقاولة ممتازة جدا لكن تبي لها خبرة ولا تحتاج راس مال لانك تبي تاخذ من راع البيت مقدم وبعدها دفعات واحتمال انك ما تحتاج من المية الف الا شي بسيط..

لكن يبي لك تشوف عمال جيدين وعندهم خبرة وان حصل لك هنود تراهم ممتازين افضل من البنقال والباكستان..
تقدر تبدا بشويش يعني تركيب سراميك ورخام وتبليط وبعدين تضم له الصبغ وبعدها شغل الصبيات والارضيات وبعدين عاد تصير تستلم التشطيب للفلل والعماير الجديدة.. وهكذا

وعلى فكرة فيه برنامج يجي على قناة المجد كل سبت بعد العشاء اسمه الطريق الى السوق يقدمه خالد الزامل رجل تجاري فئة اولى تستقيد من افكاره وبامكانك الاتصال به وسؤاله

[فهيد القريشي]

الهداد والله ان راسك ومخك نظيف

عاني برسلك ايميلي

وخلنا نتفاهم

مير الفكره اللي قلتها انا حرام ولا حلال ؟

[الهداد]

حياك يافهيد .. وابشر بسعدك ان شاء الله

والفكرة اللي قلتها مهيب واضحة لكن كأني فهمت منها انك تشتري سلعة بمبلغ مئة الف وتبيعها على شخص بثمن مؤجل مئة وعشرين الف فتكون انت تربح عشرين الف بدون تعب..

هذي الطريقة اسمها تورق وهي جائزة بهذه الصورة حيث يشترط شرائك للسلعة من طرف ثالث وتتملكها ثم تبيعها على الطرف الثاني(اللي بيشتريها اقساط) بعقد جديد ..
ولكن انتبه!!... لا يصح ان تشتريها من الشخص نفسه ثم تبيعها عليه مرة اخرى بسعر اعلى لان هذه عينة وهي عين الربا كما قال صلى الله عليه وسلم

المشكلة هنا السداد.. فكيف تضمن انك ستستلم المبلغ في الفترة المحددة وهي مخاطرة واحيانا اذا كان الشاري ما يخاف الله يبي يحسر بك..

انت الان امام امرين مهمين: الاول : الفرص قد لاتتكرر(موسم/ قلة العرض وكثرة الطلب). الثاني: دراسة جدوى المشروع بالاخص الزمن(سنة) وسرعة وفعالية تحصيل العوائد (التجارة مقابل الاستثمار)