صفحة الشاعر / حجاب بن بدحان الروبه السبيعي

[الراعي]

شاعرنا ( الاخ الكريم حجاب بن بدحان السبيعي من أهالي رنيه
رجل يجبرك على احترامه متحدثا او مستمعما
يجمع بين رجاحة العقل وفكر ناضج
والنظرة الثاقبه لما عليه المجتمع
استغل موهبته الشعريه وثقافته الدينيه
ومجالسته لاهل الخير ليكون داعية الى الله
باسلوب راقي ممتع سبر مشاكل الشباب
( البعد عن الله )
وراء الملهيات
واتباع الشهوات
وعقوق الوالدين
فحز ذلك في نفسه وانبرى لها
بقولا سديد وأبيات ذات معنى اصيل
يحرك شغاف القلوب ويدميء النفوس
ويعيد التوجه ويصيغه في منظور اسلامي
وهاج ( العودة الى مباديء الاسلام السمحه )
عرفته في صيف العام الماضي
عندما شارك في المخيم الدعوي
بقصائد ذات النهج الاسلامي
ثم شارك هذا العام بأغلب ما في جعبته
فأثر في النفوس وكسب القلوب
وهتف الجميع بالدعاء له بالتوفيق والحسنات
ثم كان لزاما عليه أن انقل لكم بعض قصايده
فطلبت من أحد رفاقه ان يكتب لي قصايده
وبنسخها لي في دسك ليكون نفعها اعم واشمل
انه الشاعر الخلوق المبدع حجاب بن بدحان الرويبي
معلنا ولادة شاعر دعوي
سيكون له بأذن له مشاركات وامسيات
في المخيمات الدعويه
التي ترعاها وزارة الشئون الاسلاميه
في انحاء كثيره من البلاد السعوديه
ولها نفع كبير وسلامة الجميع
بسم الله الرحمن الرحيم

(( نصيحة لأصحاب البيلوت ))
يا
هل البيلوت توبوا لرب العالمين= وانتهوا من لعبها ما كسبتو منه خير0
وأسمعوا مني نصيحة عساكم سالمين =والنصيحة طيبة للصغير وللكبير 0
لا تضيع أعماركم يا شباب المسلمين = واذكروا يومٍ وراكم على المذنب عسير0
من يضيع فرصة العمر يصفق باليدين= يوم أحد في جنة الخلد وأحدٍ في السعير0
لا تحسبون السعادة حياة الغافلين= السعادة عندهم وقتها وقتٍ قصير0
السعادة طاعة الله وبر الوالدين = والسجود لخالق الكون في الثلث الأخير0
لا متى وانتم على الوضع هذا غافلين= كيف يغفل واحدٍ جاه من ربه نذير0
والحوادث والمصايب تجي في كل حين = والمنايا ما توفر غني ولا فقير0

الشاعر / حجاب بن بدحان الرويبي السبيعي

[الراعي]

نصيحة بعنوان (( استغفر الله ))


الخلفة اللي ما يفيدك لبنها=ودك توديها لبعض الجزازير
لا خير لا فيها ولا في ثمنها=وجودها في الأرض شراً بلا خير
إن طعت شوري لا تجود رسنها=أطلق رسنها يا زبون المناعير
وابعد بعيد ولا تقرب وطنها=والعلم ما يحتاج لـه زود تفكير
والرجل عن بعض المواقيف صنها=ويصير لك حشمه وقيمه وتقدير
ما دامتك للروح تأمر وتنها=فاستغفر الله لا حصل منك تقصير
قبل الجسد بكره تحط بكفنها=ما ينفعك كثر الأسف والمعاذير
بعض العرب لبليس نفسه رهنها=ولا يعتبر لو نصف راسه مغاتير
بالموس دقنه كل يوم يحسنها=ويصبغ شعر رأسه يبي يرجع صغير


الشاعر / حجاب بن بدحان الرويبي السبيعي

[الراعي]

بسم الله الرحمن الرحيم

نصيحة بعنوان (( يا العبد ربٍ صورك كيف تعصاه ))


يا الله يا للي كل حيٍ ترجاه= يا قابل التوبه من العبد لا تاب
أطلب من المعبود عفوه وحسناه= في ساعةٍ ما ينفع أخوان وأصحاب
في موقفٍ كلٍ يقر بخطاياه= يومٍ صعيب وما لنا عنه مجناب
مسكين يا من باع دينه بدنياه= قافيه موت وحشر وأهوال وحساب
في موقفٍ ما قدم العبد يلقاه= من خير ولا شر موجود بكتاب
أحدٍ يبي ياخذ كتابه بيمناه= واللي وراء ظهره منافق وكذاب
في ساعةٍ ما ينفع المال والجاه= إلا العمل والعفو من رب الأرباب
يجب علينا طاعة الله وتقواه= ومن طاع ربه ما تندم ولا خاب
يا العبد ربٍ صورك كيف تعصاه = وشلون تعصى خالقك وأصلك تراب
ومن طاوع الشيطان للنار وداه = نارٍ كما يذكر لها سبعة أبواب
لكن لا تتبع طريقه وممشاه = ترمي بنفسك للخطر وأنت الأسباب
وبوك سمح خاطره وتبع إرضاه= وأمٍ من أجلك عانت أهموم وأصعاب
والمال لا جاء واجبه لا تغالاه=تراه لك موهوب من عند وهاب
والجار كمل واجبه لا تناساه= وخلك لفعل الطيب والخير كساب الشاعر / حجاب بن بدحان الرويبي السبيعي

[الراعي]

بسم الله الرحمن الرحيم

نصيحة بعنوان (( أنا يوم أفكر ))


أنا يوم أفكر وأتفكر بوضع الناس= أشوف المعاصي تنتشر بين يوم وليل
كثير الرجال اليوم ما عاد فيه إحساس= يصدق دعاة الكذب والزور والتضليل
من الدين عاري لو جسمه عليه لباس= تأثر من أهل اللعب والفن والتمثيل
ولا شاف راعي الدين صدره يجيه إعماس= يبي مجلسٍ يوجد به القول وأهل القيل
وبعض الشباب الليا ضرب عنده الهوجاس= قدح لـه زقاره قال لأجل أنبسط بالحيل
وبعض الشباب أصبح حياته قنوط ويأس= يجمل لـه الشيطان درب الردى تجميل
تبع شلةٍ تأكل مخدر وتشرب كأس= وطرده العمل من بعد ما جاهم التحليل
ألا يا حياة الهم يا عيشت الإفلاس= حياة تدهور ما بقى فيه عزم وحيل
ومن باع دينه صابه الهم والوسواس= ولو مات قبل يتوب قافيه غي وويل
وأنا بنصح الرجال عن خوة الأدناس= يحطون لـه عن سكة أهل السنع تحويل
وترى من يجنب سنة المصطفى ينحاس= ولا ينفعونه شلة النفخ والتطبيل
وأنا أستثني أهل الطيب كسابة النوماس= أهل مجلسٍ يوجد به الذكر والتهليل
يقرون أحاديث الغفاري وابن عباس = هذولاء هل الطاعة هذولاء خيار الجيل
رجالٍ الليا خاويتهم يرفعون الراس= عليهم ثياب المرجله فصلت تفصيل
الشاعر / حجاب بن بدحان الرويبي السبيعي

[الراعي]

يجب على المسلم يحاسب ضميره

نصيحة لكل مسلم
يا الله يا علام خاف السريره= يا واحدً بأمرك يسيرن الأقدام
يا واحدٍ ما يعلم السر غيره= يا عالمٍ غيب الليالي والأيام
يستغفرك عبدك ذنوبه كثيره= يا الله تغفر لـه قبل يا لبس الخام
يا العبد ما دامت حياتك قصيره= تمر عجله كأنها طيف الأحلام
أطلب من الله العفو والستيره= واختم حياتك وأنت صوام قوام
ومن المعاصي لا تحقر الصغيره= واحرص على وصل القرابة والأرحام
وخلك مع أصحاب الوجيه السفيره= واترك مجالس كل فاجر ونمام
واذرف من عيونك دموعٍ غزيره= واندم على ما فات في ذيك الأعوام
وجنب عن أصحاب القلوب الشريره= اللي يحبون المعاصي والأجرام
ركايب الشيطان مدري حميره= يسوقهم ويقودهم قود بخطام
يوقعونك بالذنوب الكبيره= ولا ينفعك عض الأنامل والإبهام
صاحب وسيع المعرفة واستشيره= اللي بخيص في المسايل والأحكام
فالكل منا عارفٍ وش مصيره= حفرة وثوبٍ ما لـه جيوب وأكمام
من بعدها نارٍ توقد سعيره= والا بجنات السعادة والإكرام
يجب على المسلم يحاسب ضميره= ويتوب عن كل المعاصي والأثام
يا الله ياللي ما لنا رب غيره=عساك تنصر دينا دين الإسلام

[الراعي]

نصيحه للابن / بدحان حفظه الله
بديت باسم مكون الكائناتي= ربٍ خلقنا من عدم لا وجودي
عالم خفايا المور والبيناتي= ورافع سماواته بليّا عمودي
عسى يبدل سيئتي بحسناتي= في موقفٍ فيه الجوارح شهودي
ومن بعد ذكره قلت لي اكلماتي= مثايلٍ مثل الذهب والنقودي
أوصيك يا بدحان وأحفظ وصاتي= ترى الوصية للمفكر تزودي
صل الصلاة وحج وأد الزكاتي= وأحرص تصير بنعمة الله جحودي
وأطلب من الله الهدى والثباتي= ولا تنخدع بمخططات اليهودي
وأمك لها يا مسندي واجباتي= عليك تسهر والخلايق رقودي
لا غبت عنها ما اهتنت بالمباتي= ترجو لعلك من غيابك تعودي
والمرجلة ودروبها متعباتي= اللاعلي رجلٍ قوي الزنودي
وأعط الرجال حقوقهم وافياتي= ترى الكرم والطيب ما لـه حدودي
وعلى الخطايا ما يجوز السكاتي= لاجت من اللي يلهدون الكبودي
والكذب عند الناس أخس الصفاتي= إما نقص من صاحبه ما يزدوي
وترى غناة النفس هي الغناتي= ما هي غناة أهل الذهب والنقودي
وأغنم شبابك قبل فوت الفواتي= وما فات من عمر الفتى ما يعودي
ولا خير في عمرٍ وراه المماتي= لابد ما تطوي عليه اللحودي
الشاعر / حجاب بن بدحان الرويبي السبيعي

[الراعي]

نصيحة لكل مسلم قبل الرحيل
يا بايع دينك بدنياك خسران= ما تدري أن الموت والقبر قافيك
مادامك المديون والموت ديان= أرجع لدينك وأطلب الله يهديك
اغنم حياتك قبل يطون الأكفان = أسمع نصيحة من يحبك ويغليك
الموت كم غيّب من أصحاب واخوان = لا تحسب أنه لا تعداك ناسيك
حافظ على خمس الفرايض والاركان= وأنفق مادام الله من الخير معطيك
والوالدين حقوقهم شانها شان= أكمل حقوق الشايب اللي مربيك
قدمك نهارٍ فيه رابح وخسران= ما ينفعك مالٍ عن الدين ملهيك
تحصي لك أعمالك وتوزن بميزان= والله على ما كان قدمت يجزيك
الحمد لله ديننا خير الأديان= أقبل وتلقى داعي الخير يدعيك
والله ما يعرض عن الطاعة إنسان= إلا ضعيف إيمان ما فيه تشكيك
أنصحك لا تصحب رديين الإيمان= ترمي بنفسك للخطر والتهاليك
لا تصحب إلا كل عاقل وفهمان= وإلا ردي المعرفة لا يخاويك
بعض الشباب أصبح في الأوهام غرقان= إبليس سيدهم وهم لـه مماليك
تلقى مجالسهم مزامير شيطان= حطوا زقايرهم محل المساويك
في جيوبهم تلقى مخدر ودخان= ولا يسلكون إلا ردي المساليك
ولا أعمهم فيهم نشاما وشجعان= رجالهم في كل الأحوال يشفيك
الشاعر / حجاب بن بدحان الرويبي السبيعي

[الراعي]

موعظه
أنا لا ذكرت الموت ما ذقت حلو النوم= ينكد علي نومي وزادي ومجلاسي
وأنا لا ذكرته صار غير العلوم علوم= وأنا كيف بهنأ والطلب لاحقٍ راسي
ترى كل واحد لا انتها يومه المحتوم= توقف ركابه لين يشرب من الكاسي
لكن السعيد اللي يقدم صلاة وصوم= ومن طاوع الشيطان يبشر بالإفلاسي
نشوف الحوادث حولنا كل ليل ويوم= ولكن باقي عندنا فكر وإحساسي
ويا الله أنا طالبك خوة خيار القوم= ويا الله دخيلك من مرافقة الأنجاسي
ويا الله عسى ماني من رحمتك محروم= ليا جا نهارٍ فيه الأرياق يباسي
ويا الله أنا طالبك يا حي يا قيوم= لعلك تذكر قلبي الغافل القاسي

الشاعر / حجاب بن بدحان الرويبي السبيعي

[الراعي]

نصيحه بعنوان تذكر

ألا يا الله طلبتك يا عظيم الشأن يا رحمان= أسألك يا جزيل الملك من عفوك وغفرانك
أنا عبد ك وابن عبدك رجاي العفو والإحسان= أسألك سترك الضافي يارب الكون وإحسانك
وأنا بنصحك يا الجاهل وابوصيك يا الفهمان= تزود قبل يطرق هادم اللذات بيبانك
تذكر كم رحل عنا من الأصحاب والصدقان= تذكر وين جداني وجدانك وتذكر مسكنك
تحت الثرى ومساكن الديدان= بعد ما كنت قبل أيام تسكن بين عربانك
وتذكر وقفتك قدام ربك حافيٍ عريان= بيومٍ ما يفيدونك بني عمك ولا إخوانك
وتذكر يوم يظهر كل شيء ويكشف الديوان= تراء ما كان قدمته مسجلك بديوانك
وتذكر وقفتك دون الصراط ونصبه الميزان= تبيلك حسنةً وحدة عسى ترجح بميزانك
تجود في عرى الله وابتعد عن خطوة الشيطان= ولا تتبع هوى نفسك ولا يغويك شيطانك
ولا تغفل عن التسبيح والتهليل والقرآن= تراء ما غير ذكر الله شيءٍ يبعد احزانك
ولا تنغر بالمال الكثير وصحة الأبدان= تراء لبد من يومٍ يجيك تلف بأكفانك
ولا تغفل مع الدنيا وتنسى واجب الشيبان= تراه أكبر عقوقٍ أنك تضيع حق شيبانك
ولا تهرج بعرض فلان ولا تستغيب فلان= وحسب كل كلمة قبل لا تظهر من لسانك
ولا تأكل حقوق الناس بالتزوير والبهتان= تراء ما ينقذونك من لهيب النار صدقانك
وطهر قلبك من الغش والأحقاد والأظغان= تراء عفوك عن الزلة دليله قوة إيمانك
ولا منك بنيت البيت شد البيت بالسيسان= ولا تبني على جرفٍ هيال يطيح بنيانك
ولا تنغر في حلو الكلام وخدعة العدوان= وتصبح لعبةً يلعبها في ايدين عدوانك
ولا تصبح ضحية خدعة الخداع والخوان= ترى من خان دينه لو تبي تستأمنه خانك
ألا يا الله سامحني على التقصير والنسيان= يارب ما لنا غيرك كريم وعاليٍ شانك
وصلاة الله عدد ما غرد القمري على الأغصان= على المبعوث بالتوحيد والداعي لرضوانك
الشاعر / حجاب بن بدحان الرويبي السبيعي

[مشعاب]

أشهد بالله انه شاعر وشهم

الراعي 100%


كثر من هالنوعية يا بعدي

[الراعي]

أخي مشعاب
شكر على مداخلتك
وأبشر

[مروّض]

أخي العزيز...الراعي

أشكر لك جهدك المبذول في جمع قصائد الشاعر حجاب بن بدحان الرويبي...حفظه الله و نفع به الامه..

قصائد ثمينه تريد من يتدبرها...صح لسان قائلها...


يالله عسى ماني من رحمتك محروم=لا جا نهار فيه الأرياق يباسي

دعوة يدعو بها العباد بارءهم لينالوا رضوانه و يرجون رحمته...امين

و لاهنت أخي الراعي..

[خالد الشماسي]

جزاك الله خير اخي الراعي


موضوع قيم وقصائد فريدة ومفيدة



جزى الله الأخ حجاب بن بدحان خير الجزاء على قصائدة ونظمه البديع

[الراعي]

الاخ
مروض
الاخ ابوعمر
شكرا على مداخلاتكم
للعلم دوري فقط في التنسيق ونقلها
الى منتدى سبيع وشاعرنا هو الذي طبعها
وارسلها لي عن طريق صاحب لي وله
ـــــــــــ
وهذا ما كنت اتمناه من شعرائنا
ان يتكرموا بتحميل جل قصائدتهم
ذات الهدف والمعنى الجيد
وفي اي عرض من عروض الشعر ويرسل الديسك
على احد الاخوه في المنتدى ليتم تحميلها
وارجوا من اي يشاعر ان يكتب قصيدته
على نمط كتابة الشعر في المنتديات
اي الشطر الاول ثم = الشطر الاخر
بدون اي تنسيق
وهكذا
لان التنسيق في المنتديات يختلف عن تنسيق الشعر في الوورد

مثال
يالله عسى ماني من رحمتك محروم = لا جا نهار فيه الأريـاق يباسـي

حتى لا يتعب الذي يحملها في المنتدى

[البدر]

لاهنت يالراعي

ولاهان شاعرنا حجاب بن بدحان الرويبي

الحقيقه قصايد فيها من الموعظة والحكم الشيء الكثير

جعلها الله في موازين حسناته .


اخوك البدر

[smart]

لله درك اخي الغاالي جدأ الرااااعي

انشهد انك ماااقصرت


قصااائد طيبه ورااائعه

الله يطووول في عمرك ....وعمر شاااعرها


لك مني اطيب تحيه

[ابن شطيط]

صفحه رااائعه اخوي الراعي

’’بيض الله وجهك على هذا الجمع ‘‘

ولاهنت اخوي قصائد فريده ونظم رائع

’’وما اجمل المواضيع ‘‘

صفحه جميله جدا لم امل من قراءة ما فيها

’’من قصائد راائعه ‘‘

لاهنت اخوي وصح لسان الشاعر حجاب ابن بدحان

تحياتي للشاعر


ولك اخي العزيز

[طويق]

الراعي شكرا لك نظير ماقمت به من عمل
فجزاك الله خيرا وكذا الشاعر / حجاب الرويبي

كثر منها0000

[الحميدي السويدي]

صح لسان الشاعر حجاب بن بدحان السبيعي وقصائد جميله من شاعر رائع

[عيسى السبيعي]

الأخ الراعي

تسلم يالغالي على النقل الممتاز

وصح لسان الشاعر أبو بدحان ,,

تحياتي يالغالي

[الراعي]

شكرا للاخوه أعلاه على مداخلاتهم القيمه

[عزالقبيلة]

مشكور يالراعي على نقل هذه القصائد التي ندعوا الله ان ينفع بها الجميع

وقريبا ان شاء الله سوف انقل لكم مساجلات بين الشاعرحجاب بن بدحان الرويبي والشاعر؟؟؟؟؟؟؟
فانتضرونا قريبا

[البحيح]

بيض الله وجهك يالراعي على نقل هذة النصائح التي من القلب الى القلب
اسال الله العلي القدير ان يثيب قائلها ويجزيه خير الجزاء ويغفر له ماتقدم من ذنبه

[الفيصـ م ـصل]

الراعـــي :

جزاك الله الف خير ....

وصح الله لسان شاعرنا الرئع فعلا ...

تسخير الشعر النبطي للفائده هوعين الصواب وهو المطلوب ..

وشاعرنا اجاد وافاد ... والشكر لك ولشاعرنا ...

[حزم الجلاميد]

مشكور وما قصرت ولا هنت

[صامل الميقاف]

مشكور وما قصرت ولا هنت

[مثيب الصندلي]

×?°بيض الله وجه الشاعروجعلها الله في موازين حسناته

وسلمت يدك يالراعي×?°

[إبراهيم سعد]

صح لسان ابوفهد شاعر معروف وجزل ولاهنت يالراعى

[ابو رنية]

اخو ي /الراعي
يعطيك العافيه
وابو فهد علم من اعلام الشعر
وشهادتي فيه مجروحه
قصايد لاتستغرب جزالتها من شاعرها

[خيال الصفراء]

شاعر جزل
يعطيك العافيه اخوي الراعي