اول مشاركه / خلوووووووووها

[السنحاني]

السلام عليكم يالربع
والهدف من الجيه هي الاستفاده قبل كل شي
والطارف منكم سديد


سلام في منتدى الغلبا طوال الشبور = اهل الكرم والشجاعه من قديم الزمان
جينا ندور درر من عاتيات البحور = اما كسبنا العشر ولا كسبنا الثمان

[خالد الشماسي]

يا مرحبا ما عليكم يالسنافي قصور = وافين لو ما عرفنا ربعكم والمكان
ان كان تبغا الدرر فاطلع ثلاثين دور = لا تنزل البحر يمكن فيه عشرين جان

[السنحاني]

وافي ياخالد اذن بصلي وبرجع لك

[السنحاني]

اسف على التاخير
وستلم طال عمرك

دام البقا ونت لو طال المدى ماتبور = وقرا العناوين وعلوم النشاما تبان
ما جيت ادور لها في عاليات القصور = مادام من دونها خالد بسيف وحصان

[خالد الشماسي]

بقدومكم زادت الافراح طيب وسرور = انقدم العود وانفطح كبار السمان
معزة اربوعنا قحطان وسط الصدور = مدري تسموابها ولا من اهل العنان

[السنحاني]

انا اشهد ان المعرفه زادت النور نور = قند لنا الدله ام الهيل والزعفران
ياخالد الحر من ذيك الحرار الصقور = من ماضي الوقت ربعٍ في المواقف خوان

[خالد الشماسي]

يا حي والله حضور ما يشابه حضور = نوخ ركابك وعقلها عليها الأمان
وعطنا علوم مفيدة والطريق امخبور = والنعم فيكم هل الوقفات وأهل السنان

[السنحاني]

اشوف لي في غصون العلب عدة طيور = بين الورق تختبي والكل منها مدان
والشر فيها ظهر من قبل عدة شهور = من قبل عيد الضحيه بعد عيد ارمضان
النت عندي بطي المعذره على التاخير

[خالد الشماسي]

ياما لقينا من الغادين عشرين ثور = ولو غبر الثور منزاله تحت فالطمان
ما ينطح الشر غير اللي حكيم غيور= ولا الجهاله لها روس سوات الشنان

[السنحاني]

الي خرج عن طريق الحق ماسمع شور = هذاك عند الحقيقه والله انه جبان
يوم العزاوي تعلت والمدافع تثور = مات المنافق ويحرم من نعيم الجنان

[خالد الشماسي]

كل بيلقى حسابه في صحاف النشور = السود في وجه اهلها والحساني حسان
ومسيلمة ينبش علوم عليها دهور = ياليتهم رقدوا ذيك السنة يا فلان

[ابن جمل]

والله مدري هي مباشره او تلقيط على الجره اذا كانت مباشره فا الحقيقه ممتازه وهي ذات وجه خلفه وجه
واذا كانت تلقيط على الجره فهي عايدي ولا تحتاج زود تفكير لان اهل التلقيط بعضهم علومه كبار واذا ركزت معه شوي وجة التلقيط يبقى تلقيط
على العموم نحتاج منك محاورات مباشره في مستوا هذاالابداع
يا مبدعين انشا الله اقول انشا الله
تحياتي

[السنحاني]

لاهنت يالشماسي على هذا الطاروق والجايات اكثر
شكرا لك

[خالد الشماسي]

لاهنت يالشماسي على هذا الطاروق والجايات اكثر
شكرا لك


ما هان من قال وصح لسانك

[السنحاني]

والله مدري هي مباشره او تلقيط على الجره اذا كانت مباشره فا الحقيقه ممتازه وهي ذات وجه خلفه وجه
واذا كانت تلقيط على الجره فهي عايدي ولا تحتاج زود تفكير لان اهل التلقيط بعضهم علومه كبار واذا ركزت معه شوي وجة التلقيط يبقى تلقيط
على العموم نحتاج منك محاورات مباشره في مستوا هذاالابداع
يا مبدعين انشا الله اقول انشا الله
تحياتي

ابن جمل لاهنت على المرور والنقد الهادف نتعلم منك وشرواك
تحياتي