من أول (ن) نامـر تجيـب الذبيحـه = واليوم يا عبد الندم صرت لى عم

[راعي الوضح]

هي بنت يقال إنها من بنات آل عريعر
من بدو قبيلة غامد..
ويقول الراوي بأنها دارت الدنيا على أهلها
وكانت ابنة شيوخ معروفين وحصل أن أغار عليهم قوم
وقتلوا أهلها كلهم وهربت هي بعبدها من القتل
ولكن العبد تجبر على عمته بعد أن عرف نكبتها بأهلها
وبدلاً من أن يخدمها أصبح يأمرها بخدمته وبالغ بإذلالها
وفي ليلة سهرت وهي تبكي على ما جرى لها وعلى دورات الأيام
فامرها العبد بان تنام فانشدت تقول :



هنيكم يا هـل القلـوب المريحـه
وما لوم عيني لو جرى دمعها دم
ابكي هلي اهل الـدلال المليحـه
واخواني اللي كل ما قلطـوا تـم
يالعبد هـذي حكايـا الفضيحـه
خل السهر لي وانت يا العبد قم نم
من اولن نامـر تجيـب الذبيحـه
واليوم يا عبد الخطا صرت لي عم

[العويد]

هي بنت يقال إنها من بنات آل عريعر
من بدو قبيلة غامد..
ويقول الراوي بأنها دارت الدنيا على أهلها
وكانت ابنة شيوخ معروفين وحصل أن أغار عليهم قوم
وقتلوا أهلها كلهم وهربت هي بعبدها من القتل
ولكن العبد تجبر على عمته بعد أن عرف نكبتها بأهلها
وبدلاً من أن يخدمها أصبح يأمرها بخدمته وبالغ بإذلالها
وفي ليلة سهرت وهي تبكي على ما جرى لها وعلى دورات الأيام
فامرها العبد بان تنام فانشدت تقول :



هنيكم يا هـل القلـوب المريحـه
وما لوم عيني لو جرى دمعها دم
ابكي هلي اهل الـدلال المليحـه
واخواني اللي كل ما قلطـوا تـم
يالعبد هـذي حكايـا الفضيحـه
خل السهر لي وانت يا العبد قم نم
من اولن نامـر تجيـب الذبيحـه
واليوم يا عبد الخطا صرت لي عم

الأخ راعي الوضح

القصه المذكوره اعلاه غلط فالقصيده لنوره الرشيد اخت الجنازه

قالت هذه القصيده بعد ان سقطت حائل في حكم بن سعود رحمهم الله جميعاا

وهناك بعض التعديلات في القصيده مثل اخر بيت هو ( واليوم يااعبد الندم صرت لي عم )

والقصيده اكبر من كذا بكثير

ولكن لا اعلم من من اللي الف هالقصه اللي تقول من انها من بنات بن عريعر من قبيلة غاامد :)

انا اخبر بن عريعر من شيوخ بني خالد وش جابه غامدي

راعي الوضح تأكد من النقل بارك الله فيك

والله لا يهينك

اخوك

[مشعاب]

ما شاء الله عليك يالعويد


صرت مؤرخ :)

[راعي الوضح]

مساك الله بالخير يالعويد
والله لا يهينك على التعديل
القصة سمعتها بهذا الشكل بدون زيادة أو نقص مني
وحبيت انقلها لمنتدى سبيع
وذا فية اي خطا فهو خطا غير مقصود
وياليت تتأكد من القصة أكثر وتعطبنا دليل على أنها لبنت ابن رشيد
وبنسبة لابن عريعر من الي ما يعرفة شيخ بني خالد ( حامي بيض الحباري )
لا كن هذا الي سمعت
وانا او مرة اسمع بأبن عريعر مع قبيلة غامد
بس ما حبيت اغير شي

[عيسى السبيعي]

الله الله في النقل الطيب

ويلزم التأكد قبل النشر ( النقل)

لا هنتوا جميع

[smart]

الله لايهينك ياااراااعي الوووضح

وفي عاالم النت لاتستغرب شيء


ممكن يحطوون الخالدي غامدي:eyecrazy:


لاهنت مع أجمل التحااااايااااا

[راعي الوضح]

اخوي smart
في عالم النت ما يصير الخالدي غامدي ممكن يصير الزهراني سبيعي
اتوقع في اسماء تتكر في كثير من القبائل وماهي محصورة على قبيله حدة
على سبيل المثال
فية سبيع قبيلة
وفية السبيعي عنزي
وفية الدويش مطيري
وفية الدويش من حاضرة الزلفي ( بكسر الياء )
وفية الجبعاء مطيرى
وفية الجبعاء بلوي
وفية العماني سبيعي
وفية العماني دوسري
وفية برازي سهلي
وفية برازي مطيرى
وفية عبدلي شريف
وفية عبدلي عنزي
وفية عازمي عتيبي
وفية قبيلة العوازم
وفية حازمي حربي
وفية قبيلة الحوازم
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
وفية وفية وفية
كان العريعر حكر على بني خالد ترى ما عندي خبر محد قالي ؟
سبق وقلت القصة سمعتها بهذا الشكل صحيح اني ما سئلت احد بعد ما سمعت القصة عشان التأكيد
لاكن البركة فيكم
اكدو الموضوع ونا على اتم استعداد اغير الي سبق وكتبتة
ومع الف تحية اخوي SMART
ومشكور على المداخلة والله لا يهينك

[راعي الوضح]

اشكر اخوي العويد على التنبية
وتحديدك لى ان صاحبة القصيدة من قبيلة شمر ساعدني في بيان الحقيقة
وسألت احد افراد قبيلة شمر يقال لى ( حسين الخشرم ) وذكر الآتي :
أن صاحبة القصيدة هي ( نورة بنت محمد الطلال الرشيد ) توفيت في لندن قبل ثلاث سنوات
كان فية احد الصناع من أهل حائل وبعد حكم ال سعود تم اختيار احدهم وصار حاكم على المدينة المنورة
وذهبت لزيارة المدينة ورأت الرجل يامر وينها في المدينة وذكرة هاذي القصيدة ( بعد التعديل )

أبكي هلى هل العلوم المليحة
ولا لوم عيني لو جرى دمعها دم
أخواني أبكي و القصور (الفسيحة)
اخواني الى لا بغو لازم(ن) تم
ياما انتخو بسمي الى حل صيحة
وليا انتخو بي كافر الجن يسلم
اسمي كما نجماً ضرب قاع بيحة
او الصواعق يوم للضلع ترجم
نورة انا اخت الشيوخ الفليحة
ابوي حاكم واخواني صفوة الجم
ياحيف حائل فارقن ريح شيحة
بذيك الشغايا ياما قيللي سم
محمد طلال (دواً) للجروح القريحة
ناساً بنا خانت وناسنا بنا تنم
خانو بحائل كاسبين الفضيحة
وهل العاميم جعلهم في جهنم
اهل العمايم يدعون النصيحة
جهيل بدون ما تعرف التيمم
لابد ما صلف الهوى يزيل ريحه
حب الوطن يالعبد من عصر أدم
يالعبد هذي من حكايا الفضيحة
خل السهر لي وانت يالعبد قم نم
امن أولن نامر تجيب الذبيحة
واليوم ياعصر الندم صرت لي عم

[العويد]

الأخ راعي الوضح لقد استقبلت رسالتك الخاااصه

وهذا ان دل فإنما يدل على اماانتك وصدقك وطيب نيتك

الله يعطيك العافيه على التعديل يالقرم

اخوك

[راعي الوضح]

حياك الله يالعويد والله يطول عمرك

[نديم القوافي]

نورة بنت محمد الرشيد

أخت عبيد وعبدالله الرشيد

هي اللي قالت هاذي القصيدة للي
منها.


أبكي هلى هل العلوم المليحة=ولا لوم عيني لو جرى دمعها دم

وبنسبة للي توفيت في لندن قبل ثلاث سنوات

هاذي نورة العلي وهي شاعرة ولها قصايد مثل هاذي النوع


تعززو للي رحل للمدينة = اللي بني خيها تعشو عيالة

وهاذي القصيدة قالتها عند ما تقاتلو العلي ورشيد وهم عيال عم

والعلي حكمو حايل قبل الرشيد

وبنسبة للجنازة / هو عبد العزيز متعب العبدالله الرشيد


والله أعلم

[العويد]

أخي نديم القوافي يعطيك العافيه اخي العزيز على التوضيح

ولكن من قام بمساعدة الأمام عبدالعزيز الله يغفر له في فتح حاائل , هم ابناء عمومة العلي من شمر وهم عائلة السبهان وقد ناسبوا الملك سعود,, لذا تجد هناك خلاف كبير بين عائلة العلي وال رشيد وعائلة السبهاان وذلك عند سقوط حائل

اخوك

[خيَّال الغلباء]

بسم الله الرحمن الرحيم

قصيدة للأميرة / نورة اّل رشيد رحمها الله وهي تبكي على حايل :-

أبكي هلي أهل العلوم المليحه=ولا لوم عيني لو جرى دمعها دم
إخواني أبكي والقصور المليحه=إخواني اللي لا بغوا لازم تــــم
ياما انتخو باسمي إليا حل صيحه=إليا انتخوبي كافر الجن يسلـم
اسمي كما نجمٍ ضرب قاع بيعه=أو الصواقع يوم للضلع ترجم
نوره أنا أخت الشيوخ الفليحه=أبوي حاكم وإخوتي صفوة الجم
يا حيف حايل فارقن ريح شيحه=بذيك الشغايا تقل ما قيل لي سم
محمد طلال اللي جرح للقريحه=وناسٍ بنا خانوا وناسٍ بنا لم
خانوا بحايل كاسبين الفضيحه=وأهل العمايم جعلهم في جهنم
أهل العمايم يدّعون النصيحه=جهال بدوٍ ما تعرف التيمم
لا بد ما صلف الهواء يزيل ريحه=ومثلي يذوق لوعة الغبن والغم
يالعبد عقب العز كبدي جريحه=حب الوطن يالعبد من عصر آدم
ويالعبد هذي من حكايا الفضيحه=خل السهر لي وأنت يالعبد قم نم
من أول نآمر تجيب الذبيحه=واليـــوم يا عصر الندم صرت لي عــــــــــــم
هنيكم يا أهـل القلـوب المريحـه=وما لوم عيني لو جرى دمعها دم
أبكي هلي أهل الـدلال المليحـه=وإخواني اللي كل ما قلطـوا تـم
يالعبد هـذي من حكايـا الفضيحـه=خل السهر لي وأنت يالعبد قم نم
من أول (ن) نامـر تجيـب الذبيحـه=واليوم يا عبد الندم صرت لي عم

هذا والله يحفظكم ويرعاكم منقول مع خالص التحية وأطيب الأمنيات وأنتم سالمون وغانمون والسلام .

[الله يجيب الخير]

قصيدة معبرة عن تغير الحال