ان لقينا شخص صاحي ما تركنا شخص صاحي(وينك يا ابوعمر)

[بحر الشوق]

السلام عليكم وحمة الله وبركاته
استلم يا ابوعمر



من هواجيس ليا وردتها مثل المخايل=وبلها يمطر من الدمام لا وادي نساحي
ما لقينا شخص في موقع مروين السلايل=وان لقينا شخص صاحي ما تركنا شخص صاحي

[خالد الشماسي]

مرحبا باللي هواجيسة لها صلب ونفايل = و مرحبا بالماطر الي سايقه راع الفلاحي
ما تشوف الناس يومنك تولع فالفتايل = شب نارك وأحترس لا يضربونك بالسلاحي

[بحر الشوق]

البقا بك لو بعير القوم يبرك في المسايل=ما نقول الا بعير القوم عقب السيل راحي
انت لو عندك بقر في المزرعه يالشيخ وايل=كان تبشر كل ليله بالهجاد وبالصباحي

[خالد الشماسي]

لو بعير القوم نوخ في مساريح القبايل = قطعوه أهل الغنم وأكلت لغابيبه سماحي
البقر ماهوب يسرح مع مزهية الشمايل = دوره في حوشها ولا على جال البطاحي

[بحر الشوق]

ليه لا منك فتحت الضرف ما تقرى الرسايل=مير يا راعي المنيحه ردها يم المراحي
من ركب في الطايرة بتبين له كل المسايل=احد يركب في درجه لولا واحد دايم سياحي

[خالد الشماسي]

الرسائل طورها بالإميل وسند فايل = كان ما تدري عن التطوير يا مال الصلاحي
كل يقدم على قَدره وله في القِدر حايل = مير خلك مع هالأولى وتشرب مالقراحي

[بحر الشوق]

شاويٍ باع الغنم قبل امس قم جانا يفايل=اشهد انها يا جماعه حدرت وادي رماحي
زاد حر الشمس ثم جات الهوايل في القوايل=اتق الله يا صحيبي لا تقول القدر فاحي

[خالد الشماسي]

الغنم لا سرحوك ابها وحزمت الشلايل = فلا توطيها هل البل كان لك فيها رباحي
لا كلاك الحر يا ابن العود فبحث لك بدايل = لا تصال الحر كان انك تبي تسمع نصاحي

[بحر الشوق]

لعنبو رجلٍ سرح فيكم وللعربان خايل=لو اعرضكم هل البل يامناحي وش تناحي
لو تعود للبنادق والفتيله والصمايل=نعرف انك من رجال الغرس خلان المساحي

[خالد الشماسي]

خابرين أهل الصمايل والبداوه والذبايل = وكل ناس عندهم مثلك يحبون البراحي
كم صبي قد كلاه الدود وأبطى في الملايل = من يماني مكرمين الضيف يوم الوقت شاحي

[بحر الشوق]

الشجاعه ورثنا تشهد لنا حدب الصقايل=ما عرفنا من هذيك القوم يوم البرق لاحي
والنعم فيكم لكن قرب لنا عكش الجدايل=ثم ناد النا شهود اربع على عقد النكاحي

[خالد الشماسي]

يا محمد كان لك خاطر بلا شهود وكفايل= لا تفضحنا مع العربان يا مال الفضاحي
برج بيتزا لو بغيته جاك لو كاننه مايل = ولا تعلم لا رقيت وشفت بالعين الشباحي




شكرا جزيلا لك يا بحر الشوق


ليتك تحط جدول محاورات شكل صيفك ساخن هالسنة :)


وانا مستعد باللعب معك او مع احد شعار المنتدى اي وقت انشاء الله


تمسى على خير

[عيسى السبيعي]

ماشاءالله

ابو عمر وبحر

طاروقن منتاز بالحيل

تحياتي

[سعود الصندلي]

ما شاء الله تبارك الله
الله يعطيكم العافيه والسلامه
ونوريد المزيد
شكروتقدير للاستاذان ابو عمر وبحر الشوق
ونبي موعد نحضر المحاوره على الهوا مباشره



مع تحياتي
اخوكم/سعود السبيعي

[السيف]

طاروق ممتاز جدا

ابو عمر = بحر الشوق

كم صبي قد كلاه الدود وأبطى في الملايل = من يماني مكرمين الضيف يوم الوقت شاحي

لا تحرمونا من هذا الطواريق الممتعة

اخوكم السيف

[بحر الشوق]

عفو اخي ابو عمر وصح لسانك
واللعب معك مكسب
وابشر بالجدول