أشرب الفنجال واكب البياله &&

[ناصر المديري]

يا جماعه أرجو الافادة عن قائل هذه القصيدة ممن لديه العلم ..

حالفٍ ماخذ على الطرقي ريالـه

وبالثـلاث محـرم أنـه مايجيـنـي

لالقيت اللي على السكـة لحالـه

يلتفـت ويقـول ويـن المستحينـي

أوقف الموتر حيا وأبي الجمالـه

يوم ولـد الـلاش وجهـه مايلينـي

الطمع في كروة الرجلي رزالـة

خص وان جابـه مجـال الغانمينـي

والردي في حالة ماهـي بحالـه

واعوينـه مـن كـلام الطيبيـنـي

الردي لو بـان مايذكـر عمالـه

مايعـد الـلاش مقصـور اليمينـي

أركبه لعيون مـن زيـنٍ دلالـه

ماتحاكـوا فـي قفـاه الرامسينـي

مابغى غيري وانا مابغـى بدالـه

قاعـدٍ لـي بالرجـا مـدة سنينـي

الولد وان طاب قالوا :من خوالـه

وان تـردى تـر خوالـه خايبينـي

الولد وان طاب طيبه من خوالـه

بالخـوال يسـال قبـل الوالديـنـي

أشرب الفنجـال واكـب البيالـة

تابـعٍ سلمـي سـلـوم الأوليـنـي

ولاقعدنـا بالعمـل بنـا الرزالـة

ناخـذ العليـا طريـق الفايزيـنـي

قال خر الذيب من هاجوس بالـه

كلمـة يلعـب بهـا والبـال زينـي

قالهـا يومـه طرالـه ماطرالـه

من هواجيـسٍ تشيـب المرضعينـي

غرني بعض الرجال بكثر مالـه

مادرى ان الموت في حبل الوتينـي

كيف ينفعني وابا(..........) خاله

مايقوم البيـت دام السـاس طينـي

ناس وين اللي عوايـده الجمالـة

مثل ابن ظافر حمـد ليتـه يجينـي

الثنا والجـود دايـم فـي خيالـه

علمـه ظافـر سـلـوم الطيبيـنـي

جـوّد العليـا ولزمّهـا عيـالـه

وادركوا مـن علمتـه دنيـا ودينـي

واهني من باع حظه واشترى لـه

وسار في درب النبي وأخزى اللعيني

موقفـه ماكـل رجـال ينـالـه

مـن بغـى ممشـاه يقعـد مرتينـي

كم ذبح من حايل من حـر مالـه

وعادتـه لطمـة خشـوم العايلينـي


تحياتي:dr17: ..

[صقر الخرمة]

الله لايهينك يأخو السبيعي على هذا النقل الجيد لهذه القصيده الرائعه
ولاكن أسمح لي في بعض التعديل
1- الشطر الثاني من البيت الاول هو(والثلاثه حالف أنها ماتجيني) وليس كما قلت (بالثلاث محرم أنه مايجيني)

2- الشطر الثاني من البيت الثاني هو(يلتفت ويقول وين الطيبيني) وليس (يلتفت ويقول وين المستحيني)

وأنا مانيب حافظ القصيده كامله ولاكن حبيت أبين ما أعرف منها

[عايش ابوليل]

ابيض وجه اخوي السبيعي 123


فعلا قصيده في غاية الروعه والجزاله .اشكرك عل النقل المميز

[التاريخ]

السلام عليكم ورحمة الله وبركاته
اخوي صقر الخرمه
القصيده التي كتبها السبيعي ابياتها صحيحه ميه بالميه ومكتوبه في اكثر كتب الشعر هكذا وليس كما ادعيت .

حالفٍ ماخذ على الطرقي ريالـه

وبالثـلاث محـرم أنـه مايجيـنـي

لالقيت اللي على السكـة لحالـه

يلتفـت ويقـول ويـن المستحينـي

وهذه الأبيات صحيحه كما كتبها السبيعي

[صقر الخرمة]

وعليكم السلام ورحمت الله وبركاته يأخوي التاريخ وأنا كتبت الذي سمعت من الروله الذين يروون القصيد ومن أكثر من

راوي وربما يكون الحق مع أخوي السبيعي وإذا كان حصل أي التباس في الموضوع فأنا أسف

وأرجو من الأخوان إذا كان أحد منهم يجيد حفظ القصيده أن يكتبها

وتقبل تحياتي

[عقاب البرازي]

السبيعي الله لا يهينك على نقل القصيده
لاكن فيه قصيده معلرضه للشاعر الكبير المرحوم بأذن الله تعالى /دبيان بن عساف
اللي يقول فيها
الولد وان طاب طيبه من عمامه=والخوال مع العمام مساعديني
يليت تجيبها كا ن عرفتها انت او احد الاخوان الاعضاء

[ناصر المديري]

التاريخ ياهلا ومرحبا بك

مشكور على ذكر الشاعر لأن هذا مهم للباحثين

سلمت يمناك

[ناصر المديري]

صقر الخرمة نورتنا بوجودك ويمكن يكون فيه غلط بالقصيدة والمجال مفتوح للتصحيح فالانسان غير معصوم عن الخطا ..


مودتي ..

[ناصر المديري]

«®°·.¸.•°°·.¸¸.•°°·.¸.•°®»عايش ابو ليل يا مرحبا بك من ممشاك لي ملفاك أسعدتني بوجودك معنا يالقرم وانت اروع«®°·.¸.•°°·.¸¸.•°°·.¸.•°®»

[ناصر المديري]

عقاب البرازي يامرحبا بك يابن العم بخصوص القصيدة اللي لدبيان بن عســاف انشالله ادورها لك وان لقيتها بحطها على طول لعيونك يالغالي


مودتي

[صقر الخرمة]

الله ينور حياتك يا أخوي السبيعي وكما تفضلت مافيه أحد معصوم من الخطاء

والله يهدينا وياك لدرب الصواب

[وادي الــثلــج]

قائل هذه القصيدة..

الشاعر / راشد بن حسن بن مانع بن رحيان الضاعني الملقب بــ ( ابن الذيب ) ..


وقيل انه توفي عام 1986م وهو في نجران وكان شايل معه شخص موصله الى قرية في نجران وحصل عليهم حادث وتوفي رحمه الله ..




راشد بن حسن .. كان يشتغل في شركة ارامكوا السعوديه .. وكان يملك سيارة الشركه ( جمس ارامكوا ) ..

وكان كل ما شاف له رجلي والا طرقي على الخط يبي احد يوصله يقوم ابن الذيب ويوصله بدون مقابل .. على سيارة الشركه ..

حتى اشتهر عند البدوان ... لا جا احد يبي يروح مكان ولا عنده مطيه والا موتر .. يمشي في طريقه ويقول عسا يلقاني ( ابن الذيب ) على الطريق والا انا القاه ...

ويشيلني ويوديني للمكان اللي انا ابيه .. حتى قاموا الناس يطرونه ويحكون فيه وهم لا يعرفونه ولا قد شافوه ..

جاء يوم من الايام الا عجوز وعندها غنم شوي تعد على الاصابع .. و ( راشد بن حسن ) ... كان مشغول ومتأخر على الدوام شوي ..

وشاف العجوز وشاف معها غنم تعداها وهملها .. عقب حزت في خاطره واستحى وراعي الطيب ما يجوز عن طيبه وقف الموتر ورجع للعجوز ..

يوم جاها قالها يا مره انا ابشيلك وبوديك المحل اللي تبينه لكن بدون غنمك .. انا متأخر على الدوام واخاف غنمك تأخرني زياده ..

قالت له العجوز .. خلاص رح الله يستر عليك يا ولدي ..

انا جالسه هنا انتظر ( ابن الذيب ) ..

هو اللي بيجيب العلم وبيوصلني المكان اللي انا ابيه انا وغنمي .. وهي ما تعرفه .. ولا تدري انه ( ابن الذيب ) .. هو نفسه اللي هي تكلمه ..

يوم انصدم ( راشد بن حسن ) بقولها .. وتعجب !!

قال اركبي يا خاله انا ( ابن الذيب ) وابشري بعزك ..

ابوصلك انتي وغنمك ..

وكانت انظمة ارامكو تمنع السائقين ان يشيلو الرجليه اللي يوقفون السواقين ويطلبونهم توصيلهم على طريقهم .. وشلون توصيل الغنم ؟؟؟؟؟

حتى وصل علم .. لشركه بفعل ( راشد بن حسن ) .. وهدد بالفصل من الشركه اكثر من مره .. وبعض رؤساءه يأسوا من المحاوله معه .. واعجبتهم شهامته ..

وصل العجوز إلى منصاها والمكان اللي تبيه ..





وادي الثـــــــــلج

[وادي الــثلــج]

هذه اول ابيات القصيدة

قالهـا ابـن الذيـب مـن هاجـوس بالـه
كلـمـةٍ يـلـعـب بـهــا والـبــال زيـنـي
قـالـهــا يــومــه طــرالــه مـاطــرالــه
مـن هواجـيـسٍ تشـيـب المرضعيـنـي
حـالـفٍ مـاخـذ عـلـى الطـرقـي ريـالـه
وبـالـثـلاث مـحــرم أنــــه مايـجـيـنـي

[إبن عجيان]

نعم لبن الذيب وقصيده جميله

ويقال انه والد الشاعر محمد ابن الذيب اشاعر المعروف

[الحريص]

نعم والد الشاعر محمد ابن الذيب اشاعر المعروف

[فـــالح السبيعي]

شكراا لك أخي وادي الثلج

والمعلومات التي أوردتها صحيحه 100%

وشكراا لصاحب الموضوع السبيعي123

[ناصر المديري]

لاهنتو يالربع ودمتو