تسجيل الدخول

مشاهدة النسخة كاملة : ابا الديار الي بها سهول وسبيع


عقاب البرازي
01 - 12 - 2005, 03:44
قصيده للشاعر/ شايع بن فراج المحلفي عندما كان باالشمال والقصيده تختصر المقدمات


الله على اللي لا نوينـا المطاليـع=
مشيه يونس مع خضار الربيعـي
امرفعا بديه على الكيـف ترفيـع=
شد الوكالـه ماهـواه الرجيعـي
جيباً يقطـع نـازح الـدو تقطيـع=
اسبق من الشيهان مشيه سريعـي
ابي عليه اشوف هـاك المرابيـع=
شوف البداوه والجمـال الطبيعـي
سج القدم مع لابسـات الدراريـع=
سخاف البطون مهلكات الرضيعي
نجل العيون منقشـات الأصابيـع=
بنـات بـدو يتبعـون القطيـعـي
بنـات بـدون يبعـدون المشاليـع=
يتلـون قطعانـاً تلامـع لميعـي
قطعانهم هفت على مبلـج الريـع=
صفر البكار وكل شقحاء قريعـي
على الرحول تروج من غير تطبيع=
والهرش معها غاديناً له قضيعـي
منزالهم فيـه الزبيـدي مصاليـع=
قفر لـه البـدوان شـدو نجيعـي
امنوعه ربي مـن النبـت تنويـع=
الطرش وسطه والحباري جميعي
هاذا هواي وفي هواء القلب ماطيع=
ياخبـل ناسـاً للبـداوه تبيـعـي
ابا الديار اللي بها سهول وسبيـع=
دارٍ اهلهـا يشبعـون الجويعـي
دارٍ اهلهـا ينطحـون المداريـع=
دون العشاير يذبحـون الشجيعـي
قومٍ تطوع دايخ الـراس تطويـع=
واليا زبنهم خايفـاً مـا يضيعـي
ربعي هل العارض قروم بواتيـع=
اهل السلوم اللي تفـك المنيعـي
اهل السلـوم الطيبـه والمنافيـع=
عسى لهم في ذمـة الله شفيعـي
بيوتهم مثـل الهضـاب المقاطيـع=
ونجورهم تضبح بصوتـاً رفيعـي

اخو شما
01 - 12 - 2005, 05:05
صح لسااان قائلها

وسلمت يمينك ياعقاب على نقلها

محمد بن سلطان
01 - 12 - 2005, 08:39
صح لسان الشاعر .. شايع بن فرّاج المحلفي السهلي ..

قصيده جزله ..

لا هنت اخوي عقاب على طرح القصيده .. تقبل تحياتي ،،

ولا هنت يالقرم ..

اخوك
محمد بن سلطان الثوري

السيف
01 - 12 - 2005, 12:18
صح السان الشاعر مليون

وسلمت يمينك على النقل

قصيدة من النوع النادر جدا

تحياتي

عقاب البرازي
02 - 12 - 2005, 23:10
الأخوان الأعضاء
أخو شما
محمد بن سلطان
السيف
الله لا يهينكم على الأطلاع ولا هنتو ياغلاي

الزناجه
03 - 12 - 2005, 00:11
صح السان الشعر والله لا يهينك على النقل
قصيده رائعه وعطنا المزيد
اخوك الزناجه

السنو
03 - 12 - 2005, 01:00
صح لسانك ولسان قايلها

ولا هنت على الاختيار الجميل

وننتظر المزيد الله يزيدك من طالعته

ناصر المديري
06 - 12 - 2005, 00:08
صح لسان الشاعر والله لايهينك يالبرازي


ولي طلب ياليت تتحفنا بقصائد للشاعر محمد الجارالله الزقعاني السهلي حيث اني من المعجبين بهذا الشاعر وكان لي شرف مقابلته قبل بضعة شهور ..


تحياتي وانتظر ردك

عايش ابوليل
06 - 12 - 2005, 10:57
صح لسان الشاعرابو فراج ولا هنت يالغالي على النقل المميز


سعداء اخي عقاب بمشاركاتك الفعاله والله لايهينك



تحياتي

اعزيزي وافتخر
06 - 12 - 2005, 21:36
صح لسان قايلها
وتسلم على النقل ياعقاب

خوي الذيب1
06 - 12 - 2005, 21:36
لا هنت يالغالي بيض الله وجهك

عقاب البرازي
06 - 12 - 2005, 23:29
الزناجه ياهلا بك ياالغالي
والساعه المباركه مرورك على القصيده

جزل العطايا
13 - 12 - 2005, 23:48
تسلم يديك ياعقاب البرازي على النقله الطيبه وصح لسان قايلها