الحضبي/مساجله بين البرفيسور عبدالله الحضبي وسلطان الحضبي

[فهد الحضبي]

السلام عليكم
هذي المساجله الشعريه بين سلطان بن مقعد بن منير الحضبي
والبروفيسور عبدالله بن سلطان بن منير الحضبي

يقول سلطان بن مقعد الحضبي

دكتور انا أدخل على ربي من ابليسي
وابليس ملعون وسواسن وخناسي
ياكثر خوفي ويامكثر وساويسي
مدري من الحظ والا وقتي القاسي
مدري مرض نفسي تكويني وتأسيسي
لاشافني بأستريح يزد عماسي
والفكر مشغول وجروحي مراميسي
ينتابني كل لحظه غربة احساسي
سود الليالي بلاويها مقابيسي
يالله دخيلك من النكبات والباسي
ماعاد ابي تجربه تكفي هواجيسي
جربت لين التجارب شيبت راسي

وهذا رد البروفيسور عبدالله بن سلطان الحضبي

أقيس الناس ماتخطي مقاييسي
كلن على قدر طيبه جاله قياسي
مايستوي من سكن قوع الطعاميسي
واللي سكن فوق خطو النايف الراسي
درست طب النفوس وزان تدريسي
يوم أصبح الدين قبل الطب هو ساسي
ارتك على اللي يدلك فالغطاليسي
لاتقول ياكثر ضيقاتي وسواسي
ولا تقول انا برضي العالم على كيسي
ولاتقول لازم تذوق الناس من كاسي
ولاتقول هذا يسبب لي كوابيسي
ولاتقول هذا علامه يحصي أنفاسي
قل ربي اللي خلق فكري وأحاسيسي
ومكنون نفسي ومعلومي وهوجاسي
بادعيه لامنها كثرت حواسيسي
لاصرت في غبة الأفكار منحاسي

[مصلح ربح]

صح السان الشاعر المبدع سلطان بن مقعد وصح السان الشاعر والعلامه البروفيسور عبدالله بن سلطان
ولاهنت يا فهد على النقل



انتم فخر للقبيله يا الحضوب

ارفع لكم من هنا بالغ السلام
الشاعر
مصلح بن ربح بن مصلح الصميلي

[محمد بن سلطان]

صح لسان الشاعرين ..

وسلمت يمناهم ولا عدمناهم ..

رديه رائعه بين الحضوب ..

ولا هنت اخوي على ايراد الرديه ..

تقبل تحياتي ،،

اخوك
محمد بن سلطان الثوري

[وافي السبـيعي]

غريبه قصايد الحضوب

تراني مغير امزح والا الشاعر سلطان والبروفيسور غنين عن التعريف


تحياتي

[خالد الشماسي]

صح لسان شعار المساجلة الجميلة

وقد تضمن رد الدكتور سلطان وصفات طبية مفيدة جداً


لا هنت يا فهد الحضبي وأبلغ الشاعرين أعطر تحياتنا

[عبدالله الحضبي]

الدكتور عبدالله بن سلطان من المتميزين في قول القصيده الرائعه
التي يطرب لها الجميع
قافيه رائعه وابيات جزله وشاعر متمكن
له مني التقدير
والشاعر سلطان شاعر ابدع في كثير من المحافل الشعريه وأجاد
في قول القصيده الرائعه والعذبه
لهما مني الشكر
وشكرا يافهد الحضبي على الابيات المنتقاه

[فهد الحضبي]

مشكوور اخوي على الأطراء الجميل ومهب غريبه منكم لأنكم اهل رفعه وشان وقدركم دووم عالي اخوي مصلح

[فهد الحضبي]

تحياتي للجميع ولاهنتم

[المـتـزن]

صح لسان الشاعرين وشكرا للناقل والف نعم بالحضوب

[فهد الحضبي]

مشكور اخوي المتزن على المرور ومعليك زود ونعم بحالك