زبن ... مطلوب قبل الإجازة

[طويق]

السلام عليكم ورحمة الله وبركاته وبعد أرحب بجميع مرتادي منتدانا الكريم وأستأذن الجميع بطلب الشاعر :

زبن العتيبي مع هذا الطاروق الخفيف

سلام ردة عقب ماهلت ثمان من الشهر***** نبا نسج القاف . والدنيا كفى الله شرها
وين العتيبي عقب ذاك الليل ماشفته ظهر*****عسى ماعدخلاف. والدنيا كفى الله شرها






الصفوف ياجماعة

[البدر]

الليييييييييييييييييييييييييييييييييييييل


لاهنت ياطويق على الطاروق وننتظر رد زبن


الصفووف جاهزه تدور الشعار



اخوك البدر

[مسعود الحويزي]

صح لسانك ياطويق

وننتظر زبن

والصفوف جاهزه في كل وقت

تحياتي

[زبن العتيبي]

استلم ياطويق واعذرني على بطا الرد لاني مشغول شوي

يامرحبا عداد ماينبت على الارض الزهر ........ والا عدد ماطاف .والدنيا كفى الله شرها

ياللي تنادي شف عميلك حاضر ليله سهر ........ والطيب ماينعاف . والدنيا كفى الله شرها



والشكر للصفوف وللجميع

[طويق]

مرحباً بالصفوف (شيلوا البيت) واستلم ياشاعر لاهنت

إن كان ماعندك خبر بيجيك من عندي خبر****ثم لحفه بلحاف.والدنيا كفى الله شرها

أبمـسك المشعاب باليمـنى ولقـيه الــنظــر*** لو مسكته تنعاف.والدنيا كفى الله شرها

[زبن العتيبي]

اسمع ياطويق

ياصاحبي حذراك من دربك ترى دربك خطر..... ترى السنين عجاف . والدنيا كفى الله شرها

لاتحسبني لا سكت انسى ترى غيري حضر ..... الشاهد اللي شاف . والدنيا كفى الله شرها

[طويق]

خلوها (كني اشوف الصفوف متحمسين) أجل اسمعوا

استلم يازبن لاهنت

إن كان مقصدك الخطر ترى الحذر مامن حذر***كل العـنى بف باف.والدنيــا كفى الله شـرها

نــقــرب المكـوى على ذ يـل البعير اللي هدر****لو هي على الطراف.والدنيا كفى الله شرها

[زبن العتيبي]

اسمع يا طويق...............

وش مشكلة بعض العرب لاصار ماطاع وصبر.... واللي خبا ينشاف . والدنيا كفى الله شرها

ابا ا وعـد ك واجيـك لو انـك وسط غبة بــحـر.... واركبك في الهاف. والدنيا كفى الله شرها

[مسعود الحويزي]

الله الله الله الله الله

يازبن ....... انت وطويق


دائماً تمتعونا بالجزاله في هذا المنتدى

وسبق وان قلت لكما ذلك ...............

والان يتضح ويتأكد انكما قطبي هذا المنتدى

من منتديات سبيع

وكم نحن فخورين بوجودك بيننا يازبن

وانت هنا منا وفينا ماانت ضيف بل انت راعي محل

وسجلوا اعجابي وتقديري بكم

اخوكم

ابو فهد

[طويق]

يابو فهد مايصير أنا ماني سبيعي ولا عتيبي يعني مالي حق

[مسعود الحويزي]

طويق الا انت سبيعي يومنك تعرف خال مطلق ;)

وتحسبه انا .....:D


روعتني ياشييييييييييخ لوني ماذكرت .

:D

[ابن شطيط]

طويق

شامخ كما طويق

وزبن بارك الله فيك


واصلو

وتراكم حمستونا على قوله اخوي طويق

وسجلوا اعجابي بكم جميع

تحياتي

ابن شطيط

[الكوكب السيار]

الله لا يهينكم

وصح لسان كل شاعر فيكم

الشكر كل الشكر للشاعرين

طويق (( عر.....................

زبن العتيبي (( ابو حاكم ))

[زبن العتيبي]

الأخوة الأعزاء ابو فهد_ البدر_ ابن شطيط _ الكوكب السيار وجميع الحضور

الله لايهينكم على هالتشجيع وعلى هالحضور والمحاورة ماتزين الا بوجودكم

وبتشجيع عمالقة الشعر أمثالكم ...................... وشكرا لزميلي طويق

أخوكم أبو حـــــــا كــــــــــم

[طويق]

خلووووووووووووووووووووووووووووووووووووووووووووها
مرحباً بالجميع (شيلووووووووووووووووووووووووووووووووووووووها) بصراحة حماس منقطع النظير. وين رحت يازبن خلك معي

يازبن يازبن العتيبي كلها وجهة نظر**** مابين عين وكاف. والدنيا كفى الله شرها
القـنبلة تو طلعوها من مدير المختـبر**** تشرى بعشر آلاف. والدنيا كفى الله شرها


............................................
(مابين عين وكاف) = (عنك)

كل الشكر للإخوة الذين كانوا معنا (لاهنتوا ياصفوف)
الشكر موصول للشاعر زبن العتيبي على هذه المحاورة

[زبن العتيبي]

استلم ياطويق ...........

ياصاحبي هذي الليالي بين مد وبـيـن جزر...... لابيّن الميقاف . والدنيا كفى الله شرها

احذر من المسرى بتالي الليل لاغاب القمر...... لايلحقك خفخاف. والدنيا كفى الله شرها

ولاهانت الصفوف والحضور..........

[طويق]

استلموا ولكن لاتشيلون ألا البيت الثاني :

مش... يا(...) ضيعت البصيرة والبصر***الزاد لفّة ساف. والدنيا كفى الله شرها
أوكلك خابور واللعبة على بطن وظهر***القاف له صرّاف.والدنياكفى الله شرها

رسالة إلى الجمهور (مالكم الا الظاهر أما الباطن فاتركوه لأبي حاكم) .

أشكر الشاعر زبن على هذه المجاراة وأشكر الجمهور على المتابعة وإلى لقاء بكم آخر يجمعنا ودمتم .

[حمر عين]

صح لسانك ياطويق
وصح لسانك يازبن

الله يعطيكم العافيه


طويق:
هي .أبي حاكم .. وإلا أبوحاكم..وإلا أبا حاكم
أرسوا لكم على بر :)

[طويق]

وش عرفك اللغة العربية (الباء حرف جر) (أبو: من الأسماء الخمسة تجر بالياء) .

وانت على كيفك اللي تبي (أبو _ أبي) مثال (لعبت في أبي فهد) أي وريته اللي مابعد شافه

قالت العرب : لعب في الرجل لعباً . أي : لعب في حسبته .

أكيد فهمت الآن تحياتي .

أشكر مرورك أخانا والا اقول لك (أخونا) بعدين تسوي لنا زحمة .
حمر عين .

[زبن العتيبي]

اشوفك تدّرس دروس خصوصية في اللغة العربية تراه ممنوع ياطويق انتبه

واستلم هالرد.............

ياصاحبي ماضعت والمعنى ترى بيّن عصر..... كل العرب عرّاف . والدنيا كفى الله شرها

لا تمتـحنـي يـاعمـيـلي مابقـى فيـني صـبـــر...... رح دور المخراف . والدنيا كفى الله شرها

وشكرا مجددا لجميع الحضور والصفوف

وشكرا للشاعر طويق............