[ماضي المديري]

المشاركة الأصلية كتبت بواسطة ابن رتيبان

هذه القصيدة للشاعر/ رتيبان بن مقعد بن رتيبان المجمعي السبيعي
ومناسبتها نصيحة لولده مقعد

قبل الكلام اللي بصدري يجولي=سميت باسم الله رب الجلالي
مرسي الرواسي ذات قوة وحولي=ربي عظيم الشان مرسي الجبالي
واما بعد هذا وهذي وذولي=سطرت في هيض الحشاء ما بدالي
وأختار من زين الكلام الوصولي=مثايلاً تزها المعان الجزالي
معطرة ومكحلة بالكحولي=عطر القصيد وكحله اللي يقالي
سطرتها بافكار تبذل بذولي=افكار ما تختار غير الزلالي
نصيحة للي عسى له قبولي=قبول عند الله وعند الرجالي
مقعد عسى يبتل بحضٍ بتولي=يبتل طريق الخير في كل حالي
يا مقعد الدنيا خطرها يهولي=يا كثر شر أيامها والليالي
يا بوك دور عن خطرها حلولي=حلٍ يجنبك الخطر والهوالي
ابنصحك يابوك واسمع لقولي=لايا سمي العود و العود غالي
لعل عمرك يا غناتي يطولي=في طاعة الله يا طويل المهالي
افهم وصاتي قبل عمرك يزولي=والديم الله والبشر للزوالي
احرص على الطاعة وخلك عجولي=في طاعة المعبود خلك مثالي
وخلك على السنه ذراعك فتولي=سنة محمد عدها رأس مالي
وللوالدين حقوق مثل الحمولي=خلك لها زيزوم مثل الجبالي
وللربع والضيفان خلك عدولي=خلك لهم يا بوك راعي عدالي
والجار حقه كان تبغى تطولي=أكمل حقوقه ياكريم السبالي
واعرف طلوع الرجل قبل النزولي=ترى الحياة أنواع مرٍ وحالي
واحسب حسابك قبل تنوي الدخولي=قدام لا تبلش بحل السؤالي
واعرف ترى السمعه وسام البطولي=وان طابت السمعه تصيب التوالي
ومن لا عرف ينقال عنه مهبولي=يقول عنه فلان وفلان قالي
وان صار فرك خشوم خلك صمولي=صملت شجيع في اللقا ما يبالي
ودور هل الرفقه رجالٍ زحولي=كانك تبي العليا وروس العلالي
وجنب طريق اللي يدف الطبولي=روح يمين وخل دربه شمالي
وختامها على محمد رسولي=صلاة رب البيت بأول وتالي

صح للسان الشاعر رتيبان بن مقعد بن رتيبان المجمعي السبيعي

على القصيده الرااااائعه التى تحمل في طياتها الكثير من النصح والحكم

بيض الله وجهه على الراااائعه

ولاهنت اخي العزيز بن رتيبان على النقل وهذا يدل على ذوقك الرفيع