الزمن هذا غريب وفيه حاجات غريبه=عش كثير وشف كثير من الطرائف والعجايب
في زمان فات فيه الشخص ماينسى قريبه=وأكثر الأيام تلتم العوائل والقرايب
في زمان فات فيه الرجل له قدر وهيبه=خص من يم الولد لاصار فالموضوع شايب
في زمان فات فيه الخل ماينسى حبيبه=تمضي الأيام والاثنين عشاق وحبايب
في زمان فات فيه الصاحب يقدر صحيبه=ينثني بالسيف دونه كان فالدعوى طلايب
في زمان فات فيه الناس عايشةٍ بطيبه=بالبساطه والمحبه والموده والتقارب
في زمان فات فيه الجار منزلته عجيبه=كل جار يحترم جاره ولانسمع نشايب
آه ياذاك الزمان اللي قضى ماالله يجيبه=لادفعنا لارسوم ولاتخسرنا ضرايب
يازمان العولمه وش جيتنابه من مصيبه=مجتمعنا يوم أشوفه حقل فيران وتجارب
صح نسعى للحضارة مابها شك وريبه=بس ماتكون الحضارة بيننا حرب وحرايب
والله إنا مانبيه كان جتنا باغصيبه=الحضارة فكر واعي مانبيها بالغصايب
الحضارة طاعة الله هي حضارتنا الرهيبه=والتمسك بالشريعه أمر من مذر الهبايب
والنهايه جعل مافيها خضوع ولاغليبه=والحضارة نكتسبها من وصية رجل شايب
شعر/ سداح بن راشد بن ظفير