[خيَّال الغلباء]

بسم الله الرحمن الرحيم

قال الشاعر الكبير / مشعل بن شباب الشيباني ينصح المدخنين :

يا شارب الدخان بنصحك لله = تب عنه لله واحذر إنك تعودي
افتك من ناره وريحه وبلواه = لا تبتلي اللي بالمجالس قعودي
هي شجرة الشيطان زرعه ومجناه = تقضي على روحك ولا منه فودي
خسارة في المال والحال يقفاه = نار (ن) على جوفك توقد وقودي
تطويك طي مصدر الورد لرشاه = لينه حنى حالك كما حني عودي
راعيه من شربه تنفخ رياياه = يقوم يسعل لين يوعي الرقودي
وإليا رقد ما قام والوقت خلاه = حتى صلاة الصبح عنده تكودي
أبنصحك والله ما أبي لك مجازاه = أبيك تفلح في نهار الوعودي
لا بد ما للعبد توسيد يمناه = في حفرة تطوى عليه اللحودي
ما له صديق ينفعه من دناياه = ولا عاد يقدر بالصحايف يزودي
ما غير هاك اليوم تعزاه ونعاه = لا قيل يا الله ترحمه يا معبودي
الله يفكك منه ما أحسن عطاياه = ويكفيك شره لين حالك يعودي
الله يدلك مصحف الدين تقراه = حتى يجيلك يوم تبعث شهودي

منقول وأنتم سالمون وغانمون والسلام .