[الحميدي السويدي]

	بسم الله الرحمن الرحيم أخواني مشرفين وأعضاء وزوار هذا الصرح الشامخ شبكة سبيع الغلبا أنقل لكم هذه المساجلة بين الشاعرين مشرع بن ذعار العوهلي السويدي والشاعر زامل بن الحميدي المجمعي وهم شعراء أغنياء عن التعريف ومن كبار شعراء قبيلة سبيع المعروفين على الساحة الشعبية .. والبادي هو الشاعر مشرع العوهلي,,,

قبل نبدأ باللحون السامريه=ذكر ربٍ كل خلقه يرتجونه
خالق النفس السعيدة والشقيه=عالم باللي عبادة يجهلونه
أذكر الله وأشكره وأبدي التحيه=منهج لأمة محمد ينهجونه
الحضيض اللي نهج منهج نبيه=جعلنا وإياك من اللي يتبعونه
بعدها يا ابن الحميدي لد فيّه=كيف حالك يالسنافي والمعونه
لا قريت اللغز جيب الحل ليه=خابر ٍ شرواك عرفه ما يخونه
أنتم أهل العرف ورجال الحميه=كل فعل فيه ميزه تدركونه
نوهة الرجال من نوهة ذويه=يقدر اللي والدينه يقدرونه
والد ينك با لمعرفه عبقريه=كم خصيم ٍ يشتكي منهم طعونه
وأنت عرفك يا وسيع العرف حية=حسب ظني عرفهم ما صرت دونه
هضمة حقوق الوفي عيبٍ عليه=والهويّن مدحته رأس المهونه
وإن عسرك فداك والخيرة غبيه=أتركه يالقرم في ستر ومصونه
بالأمانة ما تفرط في الوصيه=أحذر إن بعض العباد يشوهونه
أعتبرها يا أخطل اليمنى هديه=المعاني بيني وبينك مرونه
أدري إن نفسك عن المدة غنيه=العطا من غير ربي ما تبونه
خابرك أنك ما تبي لأحدٍ عطيه=والخصيم إن زاد كحلتوا عيونه
بس من شان الثقة والمقدريه=الهدو لا جاء النشاما يقبلونه
ويش رجل ٍ مركبه فوق العبيه=مركبٍ فريس ربعك يركبونه
ينطح الغازين ويخاوي الغزيه=وإن ركب غير الحصان يعذربونه
ويش رجال ٍ يسمّا به خويه=له خوي ٍ يعرفه ما شاف لونه
الرجل معروف له حسنه وسيه=في الردى والطيب يوجد له نمونه
شاع ذكره في العصور الجاهليه=كل سكان الجزيرة يعرفونه
ويش رجال ٍ أفعوله عالميه=يذكر اللي ما يشوفنّه عيونه
ما يجيب العلم للناس الغبيه=ما يجيبه غير للي يتكنونه
يشرح اللي صار ويعد القضيه=بعد تفصيل القضية يتركونه
ويش رجل مسكنه بطن الصبيه=والصبيه نعتبرها من حصونه
ما تسوي لا كثير ولا بليه=تنقهر لا راح وتموت أمغبونه
وأسلم وسلم على زبن الونيه=عمك اللي جعلكم ما تفقدونه
عد همال المزون العقربيه=من صدوق الوسم لا هلت مزونه

الشاعر / مشرع بن ذعار العوهلي السويدي

أبتدي بالله علام الخفيه=الإله اللي عباده يعبدونه
عالم النفس الفقيرة والغنيه=عالم ٍ مالا عباده يعلمونه
بعدها وإعداد همال الرفيه=مرحبا باللي تشوقني لحونه
عوهلي من سلايل عهو هليه=يبدعون القاف كنهم يصنعونه
وفي الملاقا يحتمون الدوبليه=وإن ثنوا دون المتلي يلحقونه
وإن بغيت أوصف كرمهم حاتميه=ضيفهم واللي مسير يكرمونه
وجارهم ما راح يشكي من خطيه=لا نزل معهم غريب يدلهونه
وإن شكا من قل وألا معسريه=من وفاهم في دبشهم يخشرونه
كم عطيتوا يالسويدي من عطيه=لا عطوا شي ما عاد يرجعونه
فعلهم وقت العصور الاوليه=القبائل كلهم ما يجحدونه
ولا نقول أقصور في سبع اللفيه=العرب حق العرب ما يهضمونه
وإن ظلمت الناس عيب ومحقريه=قسمهم بالطيب لازم يا خذونه
وفي القصيدة جاني لغاز قويه=والأديب أهل الأدب ما ينقدونه
كنها مكتوبه بالا بجديه=مير أنا أقرا كل خطٍ تكتبونه
لغزك الأول حلوله في يديه=الحصان وسرجه اللي تخبرونه
ما يزين إلا على الصفرا الثنيه=وإن ركب فوق الكديش يشين لونه
ولغزك الثاني بلا روحه وجيه=شعر شعار الجزيرة ينشرونه
مثل ابن حثلين في ذيك النحيه=والعمى عجران لا قاله يصونه
ولغزك الثالث مثل حفرة طميه=دافنه ما كل ناس ٍ يفهمونه
حله الصندوق الأسود بالسويه=يفتحون أدراجه اللي يقفلونه
أصنعوه اللي ديانتهم رديه=ما بعد شفته ولكن يذكرونه
ولغزك الرابع نجيبه من نويه=لو عن الأفكار مره تبعدونه
صاحبٍ بعده ترى ما فيه زيه=والبلاء لا جاء قريب تكرهونه
وإن حصل فقده على المسلم بليه=يا لعل الشوف يثبت وسط نونه
وأنتهت الالغاز والذمه بريه=طن زامل كان ما خابت ظنونه
والنهاية سامحوني في البقيه=والنشا ما من تعذر يعذرونه
ما على من حط ما جوده زريه=والصعيب اللي وراه يحول دونه
والختام أنسام عود وشاذليه=للرجال نقدمه وتقدمونه

الشاعر / زامل بن الحميدي المجمعي