[ابن عبيدان]

قال شاعرنا هذه القصيدة أثر وفاة الشيخ عبدالله بن جبر بن عبيدان شيخ بني اعمر والشيخ محمد بن مطر بوثنين شيخ الجمالين وقائد لواء بالحرس الوطني عام 1408هـ يدعوا لهم بالرحمة ويذكر جانبا من صفاتهم الحميدة حيث يقول

بديت باسم الله وهو خير الاقوال=يالله يامعبود ياخير هادي
عساك تهديني على خير الاعمال=يارب وفقني طريق الرشادي
أما بعد بديت في نظم الامثال=تعبير عن ماحل داخل فوادي
البارحة ياعبيد نومي تملمال=وعيني معاديها لذيذ الرقادي
جاني خبر ياعبيد مايشرح البال=علمن جعل ليلي عليه هجادي
خبر وفاة اثنين من ربعي رجال=يبكيهم الشايب وطفل المهادي
وابكي على الشيخان وافين الاخصال=اللي نهار الكون تروى الهنادي
رجال تنومس الى حصل ذكر الافعال=صفحاتهم بالعز بيضاً جدادي
عاشوا حياة المجد في كل الاحوال=ماقابلوا حريمهم في البرادي
مامنهم الي يتبع الفي الى مال=وعن شبرهم تقصر كثير الايادي
مثل الفهود الضارية بالتجوال=أو الحرار الي بسن الهدادي
وترفعوا عن كلمة القيل والقال=وعن كلمة الغيبة وطرق الفسادي
ولو كنت بذكر فعلهم طال ثم طال=على الشرف ومن الشرف بزديادي
واليوم وافتهم مقادرير الاجال=والموت حق ولا حداًعنه غادي
ياليته امهلهم وأخذ بعض الانذال= وجنب هل الطولات بيض الأيادي
الله يرحمهم صواريم الابطال=ويجبر عزانا الله ولي العبادي
بعد الشيوخ اللي لهم فعل بتال= ودايم مكانتهم بكور الشدادي
عبدالله اللي للصعيبات حلال= يحلها لو زاد فيها العقادي
ابو جبر درعٍ على الراس وضلال= ومن شبته في وجهه العز بادي
والله فقدنا رجل يضربه أمثال= تبكي عليه سبيع في كل وادي
شيخ قضى نحبه ومن بعده اطفال= باقى صغارً دون سن الرشادي
الله يحفظهم لنا صقور واشبال= عيال اسود الغاب بالاجتلادي
وبعده محمد غاب عن وجه الاطلال=اصبح ولا امسى غير تحت الوهادي
ابن مطر بالفعل فتال حلال= قهر العداء الى شاف منهم تمادي
عاش بشرف واقفا على الحق رحال= والحق بعد الله شريف المبادي
والحمد لله ذخرنا بعده عيال= يحيون ذكره بين حضر وبوادي
والله يصبرنا على الامر بجلال= وعسى خلفهم فيه كل السدادي
وصلاة ربي عد مانور هلال=وعداد ماتنشر عيال الجرادي
على شفيع الناس في يوم الأهوال= محمد الهادي طريق الرشادي

هذة القصيدة نقلت من ديوان الشاعر مسند بن سعود السبيعي نصاً وتفصيلاً وبدورنا نشكر الشاعر كل الشكر على هذة القصيدة الرائعة الجزلة في معانيها والمحزنة في رثاها للشيخ ابن عبيدان والشيخ ابن مطر فكلهما فقيدة على قبيلة اسبيع وعزانا بأ سلافهم ففيهم الخير والبركة0