[الفهد العربي]

من أصدق القصائد وأقربها إلى النفس هي تلك القصائد الرثائية والتي تكتب من قلب وتحفظ في القلب لموضوعها
فهذه القصيدة الرثائية كتبت في الشيخ / حمد بن فالح القباني
من قبل الشاعر والراوية الكبير رشيد بن مساعد القباني

ياعين ياللي كن فـي نونهـا عـود
في جفنها كـن العوايـر تلوجـي

عافت لذيذ النـوم والعالـم رقـود
حلو الكرى بالعين عيـا يسوجـي

ولاحزنت عيني فـلا فيـه منقـود
فرقا الحبايب فج صدر الخلوجـي

على عضيد ٍ حال من دونه إلحـود
وعليه كنـي بالرمـاح مخجوجـي

حمد السجايا دايما يكسـب الجـود
ولاهوب عن درب المراجل يموجي

ماهوب مثبور ٍ عن الواجب يحـود
ولاصك باب البيت لاشاف دوجـي

يفرح إلى منه لفـى بيتـه وفـود
بوجيه خطاره بشـوش ٍ زعوجـي

رجل النقا وللصدق بالطيب محمود
ولاسمّج المجلس بعـج الهروجـي

ولاهوب خبل ٍ ينقل الكبر والـزود
اللي مثل ماقيل نقـض الخروجـي

ياقلبي اللي عقـب فرقـاه ملهـود
ويطمي عليه من الهواجيس موجي

لو هو بسوم وبيع مـاراح بعقـود
لو كان نعطي من الرجاجيل فوجي

مير القدر لاحل ماهـوب مـردود
لو سكرت دونه جميـع الفجوجـي

المـوت سنـه للمخاليـق موعـود
لو كان نلجى في حصين البروجي

يالله عسى جسمه محرم عن الـدود
ويسكن مع الأبرار للحور زوجـي