[الحميدي السويدي]

للتواصل مع النشاما في هذا الصرح الشامخ

قالوا جديدك قلت أنا لي مدةٍ ما من جديد=قفلت بيبان القريحة واسترحت من العنا
كله لجل لا يحلل المعنى راع الفكر الزهيد=اللي يدوّر للمداخل جعل عظمه بالونا
لو كان ما هو لاقي ٍ مدخل ولا هو مستفيد=إلا لجام ٍ يلجمه أشد من ضرب القنا
من كل من ينطق كلام الحق والرأي السديد=اللي يقول الحق ما جامل رفيق ٍ وأخدنا
ومن فضل ربي ما علي دام البناء ساسه جويد=ومهندسه يحمل شهاداتٍ تؤهل للبنا
شهادة الوافين عندي تعتبر أكبر رصيد=وألا خدوش الخلق لو قالت ترى ما همنا
ما همنا قول الخدوش أهل الدوادي والهبيد=اللي تحاول تنتقد لو كان ما هي قدنا
ناس ٍ ترز أنفوسها ولا لها فعل ٍ مجيد=تقصر يمانيها عن الطولات وأتموت أغبنا
أقلوبها فيها الحسد يجري مع حبل الوريد=وأكفوفها ما حاشت الناموس والروس أجبنا
ناس ٍ تغث الكبد وتحلل على ما هي تريد=لو كان ما تنظم لها بيتٍ وحيدٍ متقنا
لا شفت شعر ٍٍ تكتبه عفت القوافي والنشيد=وقلت أشهد أن اللي زرع وسط الصباخي ما جنا
يموت زرعه ما جنا غير التعب هذا الاكيد=لو طالت الأيام ما حصل جزيل ولا ثنا
وأنا على منهج هل الجزلات والمجد التليد=أنظر وراء سطح القمر والفكر لله ما دنا
أطلق خيالي وأبعد النظرة ولي عقل ٍ رشيد=يختار من عذب القوافي كل قافٍ يقتنا
يقنونه اللي يعشقون الجزل من نظم القصيد=اللي يحفظون الجزال من القصايد وأفطنا
لا سمعه الناقد يقول هذا هو الشعر الفريد=لله در أهل الجزالة شعرهم يحفظ لنا
مثل الجواهر مع مرور الوقت لا يمكن تبيد=لو بادت الأجيال منتوج الجزالة ما فنا
وهذا قصيدي حلله يا للي تحلل من بعيد=لو كان ما بيّنت راسك جعل راسك يدفنا
الشعر له من يفهمه يا صاحب الفكر البليد=مالك وماله دام فكرك للجزايل ما قنا
وأختامها يا هاجسي تبقى مع الأيام سيد=للشعر دام الشعر له شعار وأعقول أرزنا