[منصور الحري]

السلام عليكم ورحمة الله وبركاته

الله لا يهينك ياخيال الغلبا وبيض الله وجهك على جمع قصائد الشاعر رحمه الله


وإليك أخي هذه القصيدة للشاعر رحمه الله في النصح والإرشاد

يقول الذي غني بكل شعور = لا شاكي ضده ولا مقهور
لكن الذي هاضه وهيج مشاعره = يشوف الليالي والزمان غدور
زمانٍ زها زيّه وزادت مفاخره = وقامت دواليب الزمان تدور
وفيه العرب متخالفين إتجاههم = ناس مسانيد وناس حدور
وكل يقول الرآي والعلم عندي = ولا تميز الآمر من المأمور
يعدون للدنيا وينسون غيرها = وكل بما نالت يديه فخور
والطيب والمعروف ما يذكرونه = إلا مادام الوجيه حضور
ما فات مات وهات باكر مثله = ولا ترى طيبك هبا منثور
شيء يعرفونه وشيء يغرهم = يمشون في داوية الديجور
كما اللي يعشق النار لا شاف نورها = تصير في عينه ورق وزهور
والنار ما يرمي بروحه فيها = إلا فرش الليل والمزيور
يا مقدم الدنيا على الدين خاسر = لا تحسب الدنيا فرح وسرور
لا تلتهي فيها وفي لذاتها = الله سماها متاع غرور
يا ما نشاهد من مصايب بقعا = فالناس ذا ميت وذا مكسور
دنيا عناها ما يلادي خيرها = والخاتمة وسط اللحد مقبور
ما تعتبر في ما مضى من شأنها = عساك من سياتها مأجور
يا صاحبي يا صاحبي يا صاحبي = افهم كلامي لا تكون غرور
افهم نصيحة ناصحٍ منصحٍ بها = قد ذاق من بقعا حلا ومرور
احفظ صلاتك لا تكون مرائي = لازم تصليها على طهور
ولازم على المسجد مع الجماعة = حتاك تربح يوم نفخ الصور
واعط الرجال حقوقها لا تبوقها = أيضا ولا تشهد شهادة زور
وإن شفت لك مالٍ همل لا تطمعه = ترى كل مال من وراه سبور
ترى كل مالٍ يا فتى له والي = لكن بالعرب ناسٍ وساع صدور
يغضون عن هذي وهذي ومثلها = ويغتر فيهم واحدٍ مغرور
يا صاح لا تخطي ولا تقبل الخطا = ترى أمر الخطا يجلب عليك شرور
ولا تقول إني شجاع وصامل = ترى الماء يطفي شعلة الدافور
وإن صرت حرّاب ولا لك لابه = تراك من ضد العدا مخطور
وإن صرت رجّالٍ عليك مداري = مالك على الجسر عبور
احذر تهف بك القدم هفة الندم = في غية الشاذوب والهامور
وإن صرت نزّالٍ ولا لك ديره = أطلب جميل ولا عليك قصور
ولا تقول إني كبير جماعتي = تراك من بعض العرب مكبور
والناس لا تخطي على عقالهم = يجيك منهم واحدٍ ممرور
يجيك خطوى غشمري غاشم = لينك بكفه كنك العصفور
وخلك مع الدرب السليم مسالم = ولا تقول ذا ناصر وذا منصور
كم كلمةٍ باسبابها قام هية = احفظ لسانك لا تكون هذور
وإن جاك ضيفٍ في محلك ناصي = قدم لضيف الله من الميسور
أكرم جنابه لين يمسي راضي = ترى الضيف والله ما عنه مذخور
وإن كنت ضيفٍ في ضيافة مسلم = اسمح ترى بعض العرب معسور
اقنع بما قدم وسمح خاطره = وخلك لعذره يا لبيب عذور
والجار جارك لا توريه الجفا = خلّه يروح وخاطره مسرور
لا تؤاخذه لو كان زل لسانه = ولا بسبب حرمه ولعب بزور
ما قربت سمر الليالي تبعده = وكل بفعله لا مشى مذكور
وخوي الخلا ترى احترامه واجب = ترى للخوي عند العرب مقدور
عِزّه على نفسك وبدّه قبلك = واسمع كلامه وادخله في الشور
ولا تكشف أسرارٍ على الناس خافية = ترى البخيت من العرب مستور
هذا ولا تباهي بفعلٍ تفعله = الفعل يظهر والعمل منظور
ورفيق يداري خاطرك لا تجرحه = وخلك لجرحه لا حضرت ذرور
وان شفت ثلب بحمله ثاوي = ارفع بعض حمله عساه يثور
قدمت لك مما اشتعل في خاطري = واسمح وسامحني وقل مشكور
وترى الذي يسمح وهو ما يفتهم = ترى علته يبحل بها الدكتور
وصلوا على طه النبي محمد = اللي هدانا مع طريق النور

عذراً على الأخطاء المطبعية والإملائية
وتقبل وااااافـر إحترامي وتقديري