[خيَّال الغلباء]

بسم الله الرحمن الرحيم

إخواني الكرام / أعضاء ومتصفحي منتديات قبيلة سبيع بن عامر الغلباء السلام عليكم ورحمة الله وبركاته وبعد : إليكم هذه القصيدة التي أعجبتني والحكمة ضالة المؤمن والقصيدة تنطق بالحكم ويقال أنها للشاعر / عبدالله المقاطي صح لسانه وسلم نبضه وبنانه ويقول فيها :

أنا شاعر وأهوجس وألحق الهوجاس بالهوجاس = هواجيس الشعر وبيوتها دايم على بالي
بيوت الشعر يحفظها القلم والحبر والقرطاس = وأنا شاعر ولي قدري وتقديري ومنزالي
وأقول أكبر خسارة لو فقدنا الطيب والنوماس = عسى فال الكرم والطيب والنوماس من فالي
أشوف الوقت متغير واشوف الناس عكس الناس = ابنشدكم صحيح العلم وإلا أنا يورالي
تهاويلٍ يشيب الرمش منها قبل شيب الراس = ولا شيب شعر رمشي وراسي غير الأهوالي
تمر الأوله والثانيه والثالثه لا باس = لكن الرابعه يتعب بها رجلي وخيالي
وأنا رجال أحس ودايم الرجال فيه إحساس = من العصر القديم وباقيه في وقتنا الحالي
صقور الجو فيها الحر والشيهان والقرناس = وأنا مبداي مبدا الصقر راس المرقب العالي
أدوس الموت ما أخشى الموت والرخمه عساه يداس = عسى الله لا يبقي للرخوم أول ولا تالي
وجيه أهل الفلس ياليت من يكتب عليها افلاس = ويكتب في وجيه الطيبين الطيب الغالي
صحيح إن البشر ما هي سوا والله خلقها أجناس = خلق فيها البخيل وفيه من للضيف مدهالي
وبيت البخل ما لي فيه لا لده ولا مجلاس = أعيش بعيد عن بيت البخيل اخير وأشوالي
يا طارق قوم وأنا بوك جيب البن والمحماس = وقدم لي من البن المهيل نص فنجالي
تراك من الرجال أهل الوفاء اللي يرفعون الراس = وأنا رجال وأنته صير مثل أبوك رجالي
وعزَّ الدين وأنا بوك ترا الدين عزَّ الساس = وما يبنى بليا ساس فأقرب وقت ينهالي
وخذ عبرة وشوف اللي حصل لكليب من جساس = غدر به واطعنه بالرمح وإليا الدم شلالي
نهاية من عقد صحبه مع أنذال البشر ينحاس = ما يلقى إلا النذالة والردى في درب الأنذالي
وفيهم من يشب النار ويشب الفتن مقباس = يلالي والمهبل من غباها مثله تلالي
وأنا أقيس العلوم وفيه بعض علوم ما تنقاس = حقيقه ما تغير ثابته ومسجل أقوالي
مسجلها وبأعلنها وتنشرها وكالت واس = عبر كل الصحف تنشر خبر علمي ومبتالي
ويا زين الصاحب اللي صحبته مثل الذهب والماس = عساها من نصيب عيال قوم الطيب وعيالي
وبختمها بذكر الله عدد ما ذعذع النسناس = وعدد ما لاح برَّاق الحيا وانهل همالي
على خير العباد محمد المختار خير الناس = شفيع الخلق يوم الحشر بأمر الخالق الوالي

منقول وأنتم سالمون وغانمون والسلام .