[منصور الحري]

اخي الغالي خيال الغلبا العذر كل العذر على التأخير بالرد وأنا والله مادخلت المنتدى من على خبرك غير اليوم



وإليك نص القصيدة قصيدة فلسطين وأعتذر عن الأخطاء الإملائية والمطبعية

يالله ياقابل صلاة المصلين = انك تعاونا على كل جاني
العالم الله مانخلي فلسطين = لو طالت الدنيا وشان الزماني
حتى تجي حيفا ويافا وحطين = ونقضي عليكم ياطوال الأذاني
ان كان ماعشنا عليها عزيزين = لا عاش من يرضاء حياة الهوانٍ
العام نطلب ثار واليوم ثارين = والثار ماينساه كود الهداني
ان قاله الله شفتنا شوف بالعين = قوات وجيوش تهد المباني
نستولي الديرة وخضر البساتين = ونقطف الرمان والبرتقاني
ونقول خذوا دينكم ياهل الدين = الحق يرجع واليهودي مهاني
نمشي عليهم بالنشامى المغلين = حتى نخلي دارهم مرمهاني
هذا جزاء عدوانهم يوم الأثنين = على مطار القاهرة والمواني
حنا العرب حنا العرب ياملاعين = أهل الشجاعة والوفاء والبياني
تاريخنا يشهد لنا بالبراهين = لاجاء القتال وطار عقل الجباني
ياما سهجنا من ديار وبلادين = فوق النضا ومكضمات العناني
وياما خذينا من ملوك وسلاطين = ومن عالم بدين الاسلام داني
( اشكول ) يحسبنا عن الدار مقفين = مسكين يبغى له شروط وضماني
متكبرٍ متشبهٍ بالشياطين = وان قاله الله جن عشره ثماني
حنا لهم ماداموا العرب باقين = لفاث هذا عندنا يوم ثاني
يومٍ يوحد فيه راي الملايين = تحت العلم والراي راي الخواني
متضامنين وكلنا مستعدين = ومجودين سلاحنا باليماني
بقيادة الفيصل وسلطان وحسين = وخالد وعبد الله عريب المجاني
حنا السعوديين والاردنيين = في المعركة قدام قاصي وداني
وكل العرب بجيوشهم في الميادين = متقدمين بكل عزم وتفاني
يم اليهود اللي عن الحق عاصين = لين الصعب منهم يجي مرجعاني
من مات منا مات موت الميامين = ومسكانه الرحمة وخضر الجناني
ومن مات منهم ذاق حر العذابين = وفي الاخرة مسكانه اسوء مكاني
هذا وصلى الله على الطاهر الزين = اللي عطاه الله سبع المثاني
وتمت بيوت القيل سبعة وعشرين = واستغفر الله عند زلة لساني