بسم الله الرحمن الرحيم
أسعد الله أوقاتكم بكل خير للتواصل معكم في هذا الصرخ
الشامخ أطرح هذه القصيدة بين أيديكم وقد ألقيتها في
حفل الشيخ محمد بن علي بن زيد الكربي بمحافظة شرورة
وهي قديمه بعض الشئ من أيام الانتخابات البلدية قبل
حوالي ثلاث سنوات لم يسبق لها النشر وغيرها الكثير
من القصايد التي لم يتم الافراج عنها إلى الآن...
سلام يا هل الوفاء والطيب وأهل الجميل=من شاعر ٍ جاته الدعوة وهو جالها
جينا لشيخ ٍ يشيل الحمل لو هو ثقيل=مثل الجمل لثقائل لا برك شالها
شيخ ٍ يفك العقد لو فكها مستحيل=والمعظلة لا حضر بذن الولي زالها
شيخ ٍ عِرف بالكرم ماهوب نذل ٍ بخيل=فيه الكرم والمراجل كلها طالها
من لابةٍ تكرم الضيفان بن ٍ وهيل=والحيل يقلط عليها من تعنّالها
الطيب فيهُم طبيعة كل عصر ٍ وجيل=قوم ٍ على الجود توصي دائم أعيالها
قوم ٍ نهار اللقاء يروون حد الصقيل=لا ثار عج الرمك يا طيب خيالها
قوم الكرب عزوةٍ تارد لا هاب الذليل=على حياض المنايا تروي أسلالها
وفي حشمتك يا محمد ما نجي بالهزيل=والطيّبة للوفي نتعب ونشقى لها
جتني العزيمة قبل وقت الغروب بقليل=وأنا أتشرف بدعوتكم ومرسالها
الوقت ضِيق ٍ عليّ والشعر باعه طويل=والناس ما تعذر الشاعر لِيا قالها
أما يصوغ القوافي بالكلام الجزيل=وألا يخلي القصائد ماله ومالها
وأنا بنظم البيوت العصم عندي حصيل=شاعر وعرف المعاني واخذ أجزالها
ومن ينتخب مثلكم يا شيخ والله دليل=أنا أشهد أنه تخيّر خيرت أرجالها
فيك الثقة والعدالة جعل عمرك طويل=أقولها والحكيم من العرب قالها
وأختامها بالكلام الزين قولن وقيل=والمعذرة كان أنا موفيت مكيالها