[خيَّال الغلباء]

المشاركة الأصلية كتبت بواسطة ابو مترك

أخذت القلم والبوك في ساعة الأسحار = باسجل عباراةٍ بفكري طوابيري
هجوسٍ تبلاني وسيطر على الأفكار = أفكر وأحلل مير ما فاد تفكيري
أفكر بهذا الوقت وش صار وش ما صار = زمانٍ يشيّخ مالكين الدنانيري
زمانا حدى ذيب الغداري على عمار = يجي له ويبدي له معزه وتقديري
زمانٍ به الطيب رفيع النسب والكار = يوقف ورى البيبان من دون تعبيري
هذا والله اللي دار سلم العرب واندار = أمورٍ عسى الله يجعل اختامها خيري
تلاقي عيال البوم هم قادة الأحرار = فرضهم على ذا المجتمع دهنت السيري
فرضهم خسيسٍ همه الفلس والدينار = على حساب غيره كاتبٍ له تقاريري
ليا من رصيده كثر في البنك جاء بيطار = يجلس على المركى بوسط المناعيري
يبالغ بمدحه ثم تكتب به الأشعار = من أفواه ناسٍ ما تسمى شواعيري
أقوله وأنا ماعم مجموعة التجار = على العكس فيهم طيبين ومشاهيري
عيال الحمايل لا قدح في الفتيله نار = زحول الرجال اللي تقود الطوابيري
ليا جاء اللزوم تقوم ما همها الأسعار = لفعل المراجل ما تحسب المخاسيري
وأنا طالبك يا مجري الفلك والأقدار = يا مخرج ولد يعقوب من جمة البيري
إنك تبدل ظلمة الليل بالنهار = وتصلح لنا كل السنين المناحيري
على شان راعي الطيب يوفي بحق الجار = ويفزع لمنهم للمعونه نواطيري
ولا خير منها كود تكبيرة الأسحار = ورفع اليدين لمن عليه التدابيري
وصلاتي على اللي مرسله عالم الأسرار = رسولٍ دعى لله والحق والخيري

وتقبلوا تحيات أخوكم / مرزوق الفراعنه

أخي الكريم / أبو مترك مرزوق الفراعنة السلام عليكم ورحمة الله وبركاته وبعد : شكرا جزيلا لك على هذه القصيدة المعبرة والجميلة التي شخصت واقع الحال الذي طرأ على مجتمعنا المسلم صح لسان وسلم نبضك وبنانك وإعتلا شانك والله يعافيك ويبارك فيك ويجزاك خيرا هذا وتقبل فائق شكري وامتناني مقرونا بجزيل محبتي واحترامي مع خالص التحية وأطيب الأمنيات واسلم وسلم والسلام .