[حزم الجلاميد]

بسم الله الرحمن الرحيم

أخوي / الحميدي محمد الفراعنه السلام عليكم ورحمة الله وبركاته وبعد : كتب الأخ / عقيد القوم عن قصة الشيخ / فهد بن فراج بن دهيم العزيزي السبيعي مع جاره القحطاني قائلا : كان / عبدالله بن علي آل سعد القحطاني جاراً لـفهد بن فراج بن دهيم العزيزي السبـيعي في الحاير ( حاير سبيع ) فقتل ولد القحطاني ابن العزيزي بالخطأ , وكانوا صغارا في السن , فقام إبن دهيم بالذهاب للأمير / سلمان بن عبدالعزيز أمير الرياض , وقال : أنا عفوت عن ابن جاري بشرط أن لا يرحل , وعندما سمع بالقصّه الشاعر / شالح بن سفران القحطاني وهو من شيوخ الخنافـر من الجحادر من قبيلة قحطان العريقة قال هذه القصيـده :

الفعل فعل سبيع ماضين الأذكار=ما روعت جيرانها في ولدها
عزالخوي والضيف والثالث الجار=غلباء هل الطولات تعتق قودها
أهل الرمك والجيش وافين الأشبار=وأهل البيوت اللي طوال (ن) عمدها
وأهل الأشده والمسامه والأكوار=جمال التخوت الوافيه في عهدها
يوم الجزيره ثاير (ن) جوها غبار=يصابح القيمان وإلا هجدها
سبيع غلباء فعلها نايد خيار=من سالف الأزمان ما أحصي عددها
تنصى اّل عزه خص ذربين الأشوار=عصمان الأريا لا تلوت عقدها
متيهة خلج العشاير والأبكار=وقت النذر ترسي ويلحق طردها
لا صاح صياح (ن) وذرو الدبش ذار=وكل فارس ...... سابقه من جهدها
كم حلة (ن) خلوا عمادينها اطيار=وهذا منيع وذاك من تحت يدها
ستر العذارى يوم زوغات الأبصار=طار القناع وبان منها نهدها
من دونها يثنون وتروح الأعمار=ولعيونها كم جثة (ن) في لحدها
وأهل الرباع اللي بها البن يندار=وأهل الحلال اللي يذعذع سعدها
يوم القسا والجوع والوقت جوّار=فوق الصياني حشوها مع نجدها
يا فهد يا ابن دهيم يا نسل الأحرار=شقر الحراراللي ينومس هددها
يا طيب السيره ويا نمر الأنمار=شوق الهنوف اللي تنقض جعدها
لك عندنا حشمه وقيمه ومقدار=ستر القصيره يا ذراها سندها
ترفع لك البيضاء على كل معبار=من حد نجران إليا أقصى بلدها
ونرفع لك الرايات ونطوف الأقطار=ونقول من قبل العزيزي وردها
هذا الفعل تاج (ن) على الراس وشعار=يمناه في سمن المراجل مسدها
إعتاق لله ثم حشمه للأخيار=سمعه وفي بنك المفاخر رصدها
جاه الخبر ثم قال غران وصغار=كل (ن) يرد سيوفها في غمدها
لا قبلها شيئ (ن) ولا بعدها صار=قدرة ولي الكون ترقب وعدها
والله ثم والله ثم عادها امرار=ما روع الجاره بفلذة كبدها
جينا ودرنا الشور والفكر محتار=ما هي عليهم عندنا أمر وأدها
وقت العزا مؤمن وراضي بالأقدار=يطلق لنا احجاجه ويخفي لهدها
شرطه يعوّد صاحب الشان للدار=لا قبلها عدت ولا أحد (ن) شهدها
تبقى على مر الزمن صيت تذكار=فخر (ن) لحي سبيع واللي بعدها
ما هي غريبه من قديمات الأدوار=قصرة مفرج وابن فراج أعدها
ذكرتنا فعل المهادي بالأخبار=تبعث فعول مفرج (ن) من مهدها
قحطان في نجد (ن) وفي كل الأمدار=تشكر مدلهة الغريب وفهدها
يا مقدر القصره ويا مكرم الجار=البيض لابن دهيم معتق قودها
شكر وثنا لسبيع ماضين الأذكار=امسامحة جيرانها في ولدها

منقول بتصرف يسير مع أطيب أمنياتي وخالص تحياتي والسلام .