[خيَّال الغلباء]

بسم الله الرحمن الرحيم

إخواني الكرام / أعضاء ومتصفحي منتديات قبيلة سبيع بن عامر الغلباء السلام عليكم ورحمة الله وبركاته وبعد : قال الشاعر / فر اج بن مشرع الهويج السبيعي هذه القصيدة في الإبل :

نحمـد الله سعـدت بشوفـة نيـاقـي
= عقب بطاهـا علـي هـي وراعيهـا

أقولها من صميـم القلـب وأعماقـي
= وأحبهـا مـن محبـة واحـدٍ فيهـا

شعلٍ لراعي العصا مهيـب تنساقـي
= ساروحهـا مـا عـوّد يـم تاليـهـا

ما ترتـع إلا مـن البتـرا إلى صفاقـي
= ما ردها في طفاف السيـف راعيهـا

في ضف ربـعٍ إلى مـن لاح براقـي
= يرعون سحج العشاير فـي مشاهيهـا

يرعون عشب الخطر مختلف الأوراقي
= والروح تدبيرها فـي كـف واليهـا

يرعون زملوق نبـتٍ جالـه أعناقـي
= يـوم الأنـذال قاصـرةٍ هقاويـهـا

ما هم حضرٍ تعدل الماء على الساقـي
= تلقى إيديهـا حفايـا مـن مساحيهـا

كما قال الشاعر / فراج بن مشرع الهويّج السبيعي هذه القصيدة :

شريت صفراً نهار الـورد طرابـه
= صفراً طفوحٍ عذاب اللـي يماريهـا

شريتها من طورشٍ جـوك جلابـه
= يـومٍ حظـي تعـلا حـظ راعيهـا

ما ني بجمّـع رحايـل ___ و _
= ما نشري إلا سنادٍ والجرس فيهـا

عذروبها لا جاء للـورد ضبضابـه
= تشدي هنوفٍ تمقّل مـن مهاويهـا

تشدي هنوفٍ نهار العيـد نصابـه
= تضحك بسن الجهل والزين مغريها

أبغي إليا جاء من الوديـان نجابـه
= منجوبة الصـق تلفينـا طراقيهـا

قالوا من الأيسـري لتيـن نهابـه
= غدا زبدها علـى عالـي نوازيهـا

أراعى بها فاطري وأنزل مع اللابه
= اللابة اللـي تنـزّح مـن يعاديهـا

مرباعنا في شمال الصلب وحرابـه
= ومقياضنا البتر لا زانـت لياليهـا

والله ما أغبط الغشيم اللي نقش بابه
= في فيلةٍ من قروض البنك بانيهـا

وقد قال شاعر القبيلتين / دسمان بن مناحي اّل محمد السبيعي في الإبل :

العين متعة نظر والقلب مفتاحه
= أدنات ما حرك الأشواق وأحياها

لا شفت لى من خيار الذود طفاحه
= ملحاً طفوح تموح الأرض بخطاها

من طيب أبوها رقاق الزين تجتاحه
= تشعف هل الصنف والهقوه تعداها

عسماء الأيادى لجرد البيد مياحه
= وطفا تدك الوطا من كبر ماطاها

فرعاً سناد من الذرعان منزاحه
= سودا على بنتها تعـرف تهاياها

فجحاً من الساق للوبال لواحه
= غريبة اللـون تفرقها بسمراها

ملحاً تسربل بزين المشى مرتاحه
= يسبح ذهنك بصورتها وممشاها

لا حذفت راهى الأشناق شواحه
= هزعا العراقيب غاية من تمناها

خفقاء اللواحي عريضة خد مطواحه
= مشرهفة الأذن والزين يتغرشاها

واسع نحر لأوحت الهوبال فداحه
= للحوض تدحم بيسراها ويمناها

يا زينها وسط قفرٍ غـاديٍ واحه
= فيه أم سالم تجر الصوت بغناها

في نقرةٍ من خليط العشب فواحه
= وإليا روّحت عقبها من راس مفلاها

تشرب زلال الغدير وترشح ضحاحه
= تشعى المولع بحب البل ويشعاها

يقدر لها التاجر اللي يرصد أرباحه
= وإلا مقل العرب ما هوب وياها

لا شافها يشغل الناس بتلحلاحه
= ويجنب لغيرها لو كان يبغاها

ما هيب دناء تقاصرها بدوباحه
= ولا هيب زقما تسد النفس برغاها

هذيك تطلق عليها الناس جوباحه
= مستبرمٍ وجهها كنه مقفاها

تكسر شنار الهشاش وتدمر مراحه
= يا عزتي للعديم إليا تضواها

والزين يعشق بعد شقحا ومضياحه
= وضحا تردد على الأسماع طرياها

وصفراً تصاغي دقاق الشول ولقاحه
= يا زين طرخمة الصفـرا يا محلاها

وشعلٍ ليا شاشها المطنوخ بصياحه
= كن السباع الضواري تنهش أتلاها

البل سفاين ظهور البيـد شلاحه
= يا بعـد مصباحها يا بعـد ممساها

والمراجل من قديم فالبـل وفلاحه
= وإنا هل المجد والثنتيـن أخذناها

دايم زمام المكارم نلبـس وشاحه
= وأهل الوفاء تنعرف لو ما مدحناها

كل القبايل ببحر الطيب سباحه
= والمرجلة غبة ما يلحق أقصاها

والطيب قفلٍ يحوش الفذ مفتاحه
= والطايله ما تجي له كان ما جاها

منقول وأنتم سالمون وغانمون والسلام .