[حزمي السبيعي]

بسم الله الرحمن الرحيم


هذي القصيدة لشاعر حزمي فراج حزمي المجمعي السبيعي

ياصاحبي في بعدك تشين الاخلاق..
ما للسعاده في غيابك مجالي..

من ليلة إفراقك علي الفضا ضاق..
وجتني إهمومي من جنوب وشمالي..

هم المفارق بين الاضلاع حراق..
ويصلاه من نار الهواجيس صالي..

لا غبت عني ساعه آحن وأشتاق..
وشلون وانته غايب" لك ليالي..

صبري على فرقاك ماعاد ينطاق..
لو شفت حالي كان تأسف لحالي..

يامطول الغيبات ياكثر الاشواق..
تسوقني لك مثل سوق الجمالي..

من دون شوفك ماهدا بالي وراق..
ليتك تحس بغيبتك وش جرالي..

أنت الوحيد اللي له القلب تواق..
يامشغلن عقلي وفكري وبالي..

بيني وبينك عهد صادق وميثاق..
واليوم أشوفك صرت داله وسالي..

وأنا من المغرب الى وقت الاشراق..
ومن الصباح الين وقت الزوالي..

عايش بضيق وهم وأحزان وأرهاق..
ولاشي بعدك في حياتي صفالي..