[خيَّال الغلباء]

أهدي إلى زوار الموقع هذه القصيدة راجيا قبولها مع الشكر والتقدير :

طلبت ربي ليت ماني بميـــــــــلاف =قلبي رهــــيف وكل شيء يخجه
حبي سطا بالقــــلب وأتلفنى إتلاف =يتل معلوقــــي وقلبــــي يرجه
أحاول أسلي مير عاسفنى إعساف=مفتــاح قلبي في إيدينه يهــجه
قلبي على الفرقا معه يوجف أوجـاف =يالله يا والي المقـــــــادير نجــــه
شبهت نفسي راعـــي الطير هيــاف =يبي الغنيمه وأصبح الكسب هجه
يراقب الصقار في راس مشـــراف =هيـــاف أقفى مقتفيه ألف عجـــه
وزود على العجه تقفاه شــلاف =وما من ورا العاصــوف يا كود دجــه
أرجــي عسى زوله لا نمت ينشــاف =تصــبح خوافي خاطري مســـرهجه
يا عـلي حبه صوبن وأسرف إســراف =وأصبحت أنا يابوك في وســط لجه
ما مثلها بالبر أو حـــد الأســـــــياف =ولا بالحــواضر سـاكنين الخــوجــه
حبه يخج القــــلب ما يرث إخــلاف =إلى بغيت أدله سريـــع يخـــجه
ويا عيني اللى لزرق الدمع مــذراف =دمعه خلط دم على الخــد زجـــه
يا عزوتي غلبـــاء أبي منكم إنصاف =خـــلي ترى عمره ثمانين حجـــــه
يا سبيع غلبـــاء مدلهت كل من خاف =قلبي صويب وبه ثلاثـــين رجـــه
عزون لو بالشــعر من فن وصــاف =يسكــب على قلبي براد يكــجه
ولا خبرتولي حكيـــم وكشــــاف =حـــالي من الفرقــاء غدا به اعوجه
تشــابه الأزوال ما أعرف الأوصاف =تغطلست ما أعرف لجه وصــجه
أو باخص عنده من الميز عراف =الباب لا قفّـــل حكيــم يهجـــه
أطلب قبل ما يجي للعمــر قصاف =تصبح نصيب لي وأنا له موجــه
وأصبح توالي العمــر للورد قطــاف =في شــرع ربي ممسك بالمحجـه
وصلاة ربي عد ما حــج أو طــاف =بالكعبه الغراء بعمره وحجــــه

أخي الكريم / سبيعي البكيرية السلام عليكم ورحمة الله وبركاته وبعد : صح لسانك وسلم نبضك وبنانك وإعتلا شانك على هذه القصيدة الجزلة وكل عام وأنتم بخير وصحة وسلامة ومن العايدين هذا والله يحفظكم ويرعاكم مع خالص التحية وأطيب الأمنيات واسلم وسلم والسلام .