[ال حمدان]

ياالله يا محي العظام وهي رميم ياذلجلال= يا خالق الأنسان من نطفه وكون مابها
ياغافر ذنوب البشر لو كبرها كبر الجبال = ياعالما غيب الصدور وكل ما يخفابها
يا من عليك المشتكى والملتجى في كل حال= انت الرحيم ورحمتك يا حظ من يحضابها
يا منزل قطرالسماء يامن عليك الأتكال= يا محي الأرض اليباس بالعشب بعد اجدابها
يا من يقل للشي كن ويكون بأمرك لا محال=امرك يصير وقدرتك تصـيب من يهزابها
يا رب انا عبدك ولد عبدك بلا شك وجدال = عشنا على الفطره بربي ما نعيش اللابها
يارب انا شاعر وشعري من على روس الطوال= ارفع مقامه بالعلا ما نزله بأشعابها
يا رب انا عبد معرض للزلل والأختلال= ماني بمعصوم الخطايا والخطى يبقابها
لكن لا زليت يبقى دون قصد ولا افتعال = خوفي عذابك وارتجي جنتك تسعدنابها
يارب ترحمني الى من صرت بالقبر الهيال=في ساعة مالي سوى المكتوب من كتابها
يا رب تغفرلي ذنوبي كلها دق وجلال= واغفر لبي وامي الاهي رحمتك نحيابها
انا بوجهك يا الكريم تدلني عند السؤال= على كلام يكتب الجنه ويفتح بابها
انا الضعيف ولا معي غيرانت لحظات الفصال= اسألك ترحم حالتي لا حان وقت احسابها
يـوم يشيب بالرضيع يفوق كل الأحتمال= يوم سنينه بألف عام يا ويل من يبلابها
هذا رجا من عاش عمره لا قنوط ولا يزال= يدعيك والدعوه لوجهك ما خسر طلابها
من بعدها باخذ مع موضـوعي الثاني مجال =قصة زمان ضـيع الشيمه وقل اصحابها
قصة زمان فرق الأخوان من بعد الوصال= صار التواصل بينهم كنه غـريب اغـرابها
كثرت به الأحقاد والغيبه وحب الأحتيال = والهرج والتقطيع بأعـراض البشر بغيابها
قصة زمان فيه من قطع الرحم ما لا يقال = قصص تشابه للخيال من هول ما يحكابها
قصة زمن حب القرابه للبعيد عن الموال=والا الصحيح الأقربون اولى بحب اقرابها
قصة زمن كثرت به النمه ومن قيل وقال= لا رحمو اصحاب النمايم ولا رحم من جابها
قصة زمن فيه المنافق صار له قول وفعال= يسعى على شـب الفتن والنار من شبابها
قصة زمن يرفع مقام اللاش لو كله ميال= واللي يجيب المرجله يقلون كل جابها
قصة زمان مختلط فيه الحرام مع الحلال=والكارثه ناس على الفتوى تعن اركابها
زمان فيه من التفكك والفتن والأنحلال= شيء يشيب بالبشر قبل ان يجي شيابها
زمان صار به المجامل يعتبر مضـرب مثال= للطيب والخوه وحب الناس يتغنابها
زمان قدر الآدمي اقل من قدر الجمال= خليفة الله والخلافه مكرمه لأصحابها
قصة زمن ما فيه صوت يعلو على صوت الريال= لأجله دول تغـزو دول لأجل الطمع بأترابها
قصة زمن بعض الأوادم همها تجميع مال= والا الفقارى تحترق ولا تحسب احسابها
تدرون وش غير قلوب الناس من حال لحال= المال والنعمه وحب الذات كل اسيابها
بقلون عندك شي تسوى شي من بين الرجال= لا واحسافه صار مقياس البشر وانسابها
لا شك بأن المال نعمة من نعم ربي الجزال= لاصار بيدين الرجال ولا وقع بأذنابها
اللي فعايلهم تنومس ذكرهم في كل جال= واللي فعايلهم رديه خاب من يهقابها
هذا زمان مختلف ياالله في حسن المآل= وقلوبنا يارب طهرها من اللي صابها
ويا رب ترحمنا الى متنا وشدينا الرحال= في ساعة ما للبنادم غير ما بأكتابها
حنا بوجهك يا الكريم تدلنا عند السؤال= على كلام يكتب الجنه ويفتح بابها