[ابوسالم الريس]

الكاتب : ابو سالم الريس


سلامتك وعافاك يامنيع الجود
عنكم نسأل اشواقنا مالها حد
الشاهد اللي للمخاليق معبود
وحي الضمير بكل مكنون يشهد
قبل الكلام اسلم وسلم على العود
شايب من اجواد العرب عالي الجد
واطلب من اللي لادعيناه مقصود
يشفيه مما يشتكي وافي المد
وسلم على ربعك ومن حولك قعود
مآاذن بلال وصافي الريش غرد
والمجلس اللي ماتلاقيه مردود
فرشه لعطران الشوارب منجد
والثانيه كيف انت وتخبرك زود
صوتك علينا ياولد سالم آبعد
ماقد تعسر طلب وانت موجود
ملعون من ينكر جميلك ويجحد
ياسعد من ظهره بشرواك مسنود
تجلي هموم لاغدا ليله اسود
يفداك اللي مالهم وعد وعهود
ليشان مايسوى مواطي محمد
وان كان تسألني عن الحال مسعود
عساك تنعم في حياتك وتسعد
الخير واجد بان له برق وارعود
كان اول المشروع عندي بنا السد
بفضل من فضله على الكون ممدود
اللي لوجهه كل مسلم تهجد
والثانيه ساهمت معنا بمجهود
عندي جميلك دين يا الذيب الاجرد
وانا اعتبرني لك سند غير محدود
بالفعل ماهو بالكلام المجرد
وختامها بالعطر والمسك والعود
واشواق قلبي نحوكم ما تعدد