[خيَّال الغلباء]

بسم الله الرحمن الرحيم

إخواني الكرام / أعضاء ومتصفحي منتديات قبيلة سبيع بن عامر الغلباء السلام عليكم ورحمة الله وبركاته وبعد : لقد وجدت هذه القصيدة المعبرة والجميلة في أحد المنتديات إلا أنها مهملة القائل فأرجو ممن يعرف قائلها أن يخبرنا به وله جزيل الشكر وتقول القصيدة :-

هذي طبوعي كل ما عسعس الليل = أصلّـح الدلـة وأجـر اللحونـي
بريـةٍ موزونـة البـنّ والهيـل= والماء بوزن وحيّ هاك الوزوني
منهـا تكيّفنـي ثلاثـة فناجيـل= وأرتاح ويطير السهر من عيونـي
وأراجع الذكرى وأجرّ المواويـل= والذكريات بكـلّ شكـلٍ ولونـي
البعض منها يشرح الصدر بالحيل= والبعض لا والله يجـدد طعونـي
وأرجع وأفكّر في الليال المقابيـل= لعل وقتـي مـا يخيّـب ظنونـي
وأدخل على الله من حياة الغرابيل= حيث إن همّي ما تشيلـه متونـي
كنّك مفصّل فوقي الهـمّ تفصيـل= لين إلتبسني مثل لبـس الجنونـي
حالي كما حال القلوب المشاغيـل= اللي من أطرف شيء يتأثّرونـي
لو يشتكون الغبن والجور والميـل= للغيظ وسط صدورهـم يكتمونـي
فكّرت إلى الموضوع يحتاج تحليل= وفنّ الدراسة واحـدٍ مـن فنونـي
عرفت وش عكّر مزاج المشاكيـل= يوم إنهم مـن وقتهـم يشتكونـي
أول سبب : نقالـة القـال والقيـل= الطغمة اللـي جعلهـم يذهبونـي
قلوبهـم بالحقـد سـودٍ مغاليـل= ومن طبعهم بالمشكلـة يفرحونـي
وثاني سبب : ناسٍ على مثل ما قيل= لا يقطعون الشّـر ولا ينفعونـي
والله ما يرفع ضغطك إلا المهابيل= العالم اللي فـي النحـر ينشبونـي
وثالث سبب : ناسٍ سوات المخاييل= على سلوم الطّيب ما يحرصونـي
خلّو سلوم أجدادهم رغو مع سيـل= وفي عالم التقليد جو يركضونـي
طشّوا عمايمهم ولبسـوا بناطيـل= والموس فال أشنابهـم والدقونـي
وأرقابهم ما سلمت من السلاسيـل= تطبّعوا بطبـوع هيـم البطونـي
في ذمتي ما عـاد باقـي رياجيـل = إلا القليـل وجعلهـم يثبتـونـي
صفّة بعد صفّة وجيلٍ بعـد جيـل= كلٍ من اللي قبله أنقص وأدونـي
هذي هي الأسباب من دون تفصيل= شرحت روس أقلام بس اعذروني
واللي يبي تفصيل بالحيل بالحيـل= يقـدر يكلمنـي علـى تيلفونـي

منقول مع خالص التحية وأطيب الأمنيات وأنتم سالمون وغانمون والسلام .