[خيَّال الغلباء]

بسم الله الرحمن الرحيم

إخواني الكرام / أعضاء ومتصفحي منتديات قبيلة سبيع بن عامر الغلباء السلام عليكم ورحمة الله وبركاته وبعد : إليكم هذه القصائد بين الشاعرين الكبيرين / دسمان بن مناحي المحمدي السبيعي و / حسين بن معوضه اّل ملهي الحبابي القحطاني الذي اطلع علي مجله اليمامه 1421 في 24/4/1416هـ وما قاله الشاعر / دسمان بن مناحي المحمدي السبيعي حيث نشر / دسمان قصيدة ومناسبتها أن والد الشاعر / دسمان بن مناحي السبيعي مريض على أثر جلطة أفقدته قدرته على النطق والحركة ظل بعدها على السرير فترة طويلة والمعروف أنه أحد الرجال الذين أصيبوا في موقعة من مواقع جيش الملك / عبدالعزيز رحمه الله بالجنوب وذات ليله نطق باسم ابنه دسمان في نداء اخواه المرض والضعف فقال الشاعر الكبير / دسمان بن مناحي المحمدي السبيعي :-

لبيـك لبيـك يا صـوت يناديـنـي
= لبيك من بـده القاصيـن والدانـي

لبيـك لبيـك مـن قلبـي ملايينـي
= لبيـك لبيـك ثـم لبيـك بلسانـي

ما هو بلبيـك يا صـوت المزايينـي
= لبيك يا صوت أبويـه يـوم نادانـي

كفي لك فراش ولحافك هدب عينـي
= ما دام أنا حـي تامرنـي وتنهانـي

يا أبوي ما فيه شـيئ عنـك يلهينـي
= طاعتك من طاعة اللي سن الإحساني

إن مت قبلي بكيتك ليـن توحينـي
= وإن مت قبلك فلا تبكي على شانـي

وبعد هذه الأبيات جاراه الشاعر / حسين بن معوضة اّل ملهي الحبابي القحطاني قبل وفاة والديهما رحمهما الله رحمة واسعة :-

دسمان وايش فيك بأبياتـك تبكينـي
= ما كل ما سمعـت يا دسمـان بكانـي

حتي لو أبكيتنـي هرجـك يسلينـي
= دسمان دسم علي اسمك هرج سماني

الله يسامحـك يـا زبـن المخليـنـي
= حتي لو أبكيتنـي يا طيـر حورانـي

ذكرتني واحد لـي رحـت يدعينـي
= يقول لـي ودي إنـك دائـم اوزانـي

وإن كان غبـت يا دسمـان يومينـي
= جيته وقلبه علـي القـرم شفقانـي

وإن غبت عنه لكنك شائـف فينـي
= خله وقلبي خطيـر يصيبـه جنانـي

دسمان يفدونك اللي حظهـم شينـي
= الكـل منهـم يخلـي أبـوه بالعانـي

شيبانهـم بالخـلا دائـم مخليـنـي
= ندعي لهم دايـم بالمـوت عزرانـي

متكبريـن بـلاش وهـم مساكينـي
= وإن قلت غلطان قال إلا أنت غلطاني

ومودع أمـه ردي الحـظ عامينـي
= يقول تزعج عيالـي هـم وجيرانـي

إلين ماتـت وجـاه العلـم بعدينـي
= خسران يا جاحد المعروف خسرانـي

ناس على الحقد والبغضـا مربينـي
= دائم تغيض الرفيق وتشتـم العانـي

في ذمتـي مالهـم مذهـب ولا دينـي
= البعد عنهـم تـراه يجلـي أحزانـي

يا عين يرزقك سلطـان السلاطينـي
= عن رفقه افـلان وافـلان وفلانـي

عليك باللي مثـل دسمـان يا عينـي
= قصيده العذب يشرح صدر الإنسانـي

دسمان لا هنت جعل أيامـك سنينـي
= حبيت أجاريك لو ما هـي بتنصانـي

ياليت دسمان مـن ربعـي الأدنينـي
= أنا أشهد إن رفقته تشري بالأثمانـي

لا شـك ذي حاجـه ما هـي بيـدنـي
= هو من سبيع وحن من روس قحطاني

والختم يا عين كفي الدمـع تكيفينـي
= لا بد وإن ما وطـى دسمـان ياطانـي

الغيب عنـد الله عـدال الموازينـي
= وصلوا على سيد خلقه نسل عدنانـي

ولما صلت المجاراة للشاعر / دسمان بن مناحي المحمدي السبيعي بعد وفاه والده رد على المجاراة بهذه القصيدة :-

يا حسين بعد البطاء وش بك تجاريني
= تنبش جروح الزمان اللـي تحدانـي

وأنا عن مجاريات الناس يا حسيني
= يكفيني اللي من أسباب الدهر جاني

مع قو عزمي ربع ما صـار يكفينـي
= والخافي أعظم من اللي للعرب باني

ألاوي الوقت ويدينـه تـلاوينـي
= والأول من الثنين أقوى من الثانـي

يا بعد فرق التكافـي بيـن الإثنينـي
= شتان بين الزمان وبيـن الإنسانـي

مرحوم ياللي عليـك ملبـد الطينـي
= يسقي ضريحك من الهمال ودانـي

والله إن أكفن وحبك في شرايينـي
= حاويه قلب يضخه وسـط شريانـي

اختارك الله وكـل الخلـق فانيينـي
= هذا القدر والجزع نقـص بالإيمانـي

وأنا عن مكابـد الفرقـاء يعزينـي
= صبر جميـل ودعـوات بغفرانـي

يا حسين يا مقدم الربـع الكريمينـي
= يا نجل شيخ يعز الضيـف والعانـي

البر يا حسين وقت العسـر واللينـي
= في والدينـك مثـل ما قـال لقمانـي

خلك لهم غيث ورجـوع وبساتينـي
= واخفض لهم من رقيق الذل جنحاني

يا حسين ما دامهم يا حسيـن حيينـي
= فرصه ترى العمر يا فرز الوغاء فاني

لا تمسي إلا وهم يا حسيـن راضينـي
= كانك تبي جنة الفردوس مسكانـي

اللي يقصر بهم مـا فالـه بزينـي
= حتى لو إنـه يذبـح عقـر الضانـي

هذاك دينه ودين اسحـاق رابينـي
= خسران دنيا ويوم الحشر خسرانـي

مـا تنوصـي ومثلـك لو يوصينـي
= شلته من المقدريه فـوق الأمتانـي

خابرك يا حسين من روس القحاطيني
= وأنا بعد مثلكم مـن روس سبعانـي

وإن كان ودك مع الطرقة تخاوينـي
= يا مرحبا بالعديـم إن كـان خاوانـي

انشد وتلقا مـع الطيـب عناوينـي
= مثل ابن زامل معه رقمي وعنوانـي

وإلا ما دام اليمامـة بينـك وبينـي
= في كل ميدان تجمع بين الأخوانـي

صحت ألسن الشاعرين الكبيرين وسلم نبضهما وبنانهما وإعتلا شانهما وبارك الله فيهما على برهما لوالديهما . منقول مع خالص التحية وأطيب الأمنيات وأنتم سالمون وغانمون والسلام .