ياابو لبتن مثل القمر ضافي المرجود = ديرك لا تجر القلب بالعنف والقوه
شريته من البايع برمش العيون السود = وانا خابرن من باع قلبه طفت ضوه
لاكن وش اسوي يوم بعته لكم محدود = بعته غصب مابعته رضن منه ومروه
مادامه على شوفك تهب هبوب النود = سواة الغرير اللي يلهى بتلهوه
ليا هاضت أشجان الولع مانته بموجود = خطيرن ضلوعي ينفتح بينها هوه
في وادي من اللوعات ظني راعاه الدود = لا تذبح خويك في الغلا نعنبو الخوه
لو انك تولع فيه بالنار والبارود = اشوى من تفك الجيب وتمر من توه
ليا مال سلسال الذهب والثنين قعود = يصير انتفاضه باسفل الجسم وعلوه
جمال الطبيعه مال وصف الجمال حدود = يقارب البدر اربع طعش لا صفى جوه
خلاجي عليه اخلاج خلجن على مفرود = او ارزام رعادن يهد الهوى نوه