هذه قصيده فخر واعتزاز في قبائل سبيع الغلباء
للشاعر/ سعد بن سعيد بن نوار الملحي السبيعي مفتخرآ في قبيلته العزيزه والقبيله تستاهل من شعرائها المدح
يامدور المعنا ترانا عرفنا *** واضح ونوره مثل نور القوايل
انا هل الردات لامن وقفنا *** دقلاتنا تشفي الكبود الغلايل
اليا وقفنا قدمهم ما انصرفنا *** حتى نلبسهم لباس الدبايل
ناخذ على قب الاصايل شففنا *** بمخير صوته سوات المخايل
ياما سعينا في المغازي وطفنا *** غاراتنا فيها تشاف الهوايل
واليا اعتزا خيالنا وارتجفنا *** مثل الرعود الي تصب الهمايل
وان صاح صياح المغيره وزفنا *** مانلتفت للجمع لو كان ضايل
ياما كسرناهم وياما عسفنا *** من عاصين مايلتفت للهزايل
واليا تسوا غيضنا مع صلفنا *** نروي السيوف مذهبات الصقايل
حنا هل الغلبا جموعن وحفنا *** خلا الشجيع يروح قلبه ذهايل
وياما على جمع المعادي زحفنا *** ولا نرجع الا بأمهات الشمايل
وحنا هل البيرق ويامن طرفنا *** ارجال ابو تركي جيوش دهايل
في شور اخو نوره لبسنا شرفنا *** انفضل الموت المحقق فضايل
ذاك الزعيم الي لنصره نصفنا *** وبان الرفيق وبان شين الدلايل
الي على جيش المعادي نحفنا *** لين اسلمو من عقب حد السلايل
اليا رمينا الرمي نكسر هدفنا *** وتشهد على ماأقول كل القبايل
في ساعه فيها تقدم سلفنا *** تنشف بها الارياق والدم سايل
تبعد مغازينا ويبطي نكفنا *** تشهد لنا قحص المهار الاصايل
واليا عطينا عهدنا ما اختلفنا *** يومن بعض الناس فيهم فشايل
وجيرانا ماتشتكي من عجفنا *** وللضيف نطرح له قعود وحايل
ياما حذفنا في الدهر وانحذفنا *** وياكم فعلنا في الخوي من جمايل
وياكم عقيد(ن) خافنا لاعرفنا *** وقفا على جرحه يجر الولايل
وكل الخليق تروح والعمر يفنا *** وتاريخنا يبقا وتبقا الفعايل
حزنا على كل الفعايل ونفنا *** ولانلتفت في هرج عدل(ن) ومايل
وفي هرجنا ياسامعه مازهفنا *** والي مكذبني يشوف الدلايل
شوف مجدنا وافعال ربعي وشفنا *** وتعلمك الايام عن كل قايل
وبفعل طلقين الوجيه اعترفنا *** مافيه دم الا يجيله فصايل
الشاعر/ سعد بن سعيد بن نوار الملحي السبيعي