[خيَّال الغلباء]

بسم الله الرحمن الرحيم

جمعتني الصدفة بزميلي / محمد بن جبرين وتطرقنا إلى داء هذا العصر ( الأسهم اللي لعبت في حسبت الناس ) وقلت له كيفك مع الأسهم فقال كلناها في لحانا مير الله يبطي بحياة / سعد المليحي اللي فكني من خسارتها بسبب وقفته معي وقد استمعت إلى قصيدته في / سعد بن مطلق بن فالح المليحي السبيعي وإليكم هذه القصيدة وبدون مجاملة شيوخ سبيع يستاهلون :-

البارحه عن راحة البال سجيــــــــت =في موقفٍ أشبه بيوم القيامــــــــــــه
واقف كسيرٍ راجيٍ والي البيــــــت =همي على راسي أحسبه اعمامــــه
من دلة أحزاني لحالي تقهويـــــــت =حزنٍ يداقش يوم حان استلامــــــــــــه
فنجالها سمٍ على كــــل توقيـــــــت =همٍ يخاشر مسلمٍ في منامــــــــــــه
علمٍ لفاني مير ماكني أوحيـــــــــت =مير البلا المرسال ردد كلامـــــــــــه
يوم أعلنوا ترتيب سهمي تساويـت =شفت الحزن قاهر شيوخ اليمامـــــــــه
قام المؤشر يعطي أيامنا ويـــــــــت =ضعنا ما بين إعمار وأسهم تهامه
حتى نسينا اليوم فن الإتيكيــــــــت =وخصر الهنوف اللي تحذف اللثامه
وذيك الخدود اللي طعمها بساكيت =يلعن جدف خدٍ تغازله شامـــــــــــه
ضاقت علينا دروب صارت مواقيـــت =رحنا ضحية قرض عقب ابتسامه
يومي ذكرت اعيال مطلق تشاويت =قصدي سعد يسبق غناتي سلامه
شيخٍ نفوذه كاسبه دون تصويـــــت =معطي عمامه طول عمره زعامه
شيخٍ غدا للمرجله مملكة صيــــــت =شيخٍ خلقه الله عزيزٍ مقامــــــــــــه
امثبتٍ فعله على العز تثبيـــــــــــت =يومٍ ولد مطلق برتبة فخامـــــــــه
بغيت أعد أعظم سجاياه وأزريـــت =شيخٍ غدا رمز المراجل وسامـــــه
وإليا مدحت أفعال يمناه ما أوفيـــت =فعل الكريم اللي يزوده كرامـــه
حاتم نحر خيله لقومٍ مكاشيــــــــت =وخيرك نحر فقرٍ عطانا علامـــــــه
مكرم وجيهٍ أول أعمارها تهيـــــــت =مفني وجيهٍ في بعضها رخامه
أقول لله في كل شيٍ تعديــــــــــــت =علمك سبق مليون فيهم قرامه
السالفه إنك من سنين وأحييـــت =قومٍ غشاها من فقرها غمامه
بقصى يمينك سيدي دايم أعطيت =حرٍ بغى ياخذ بقية مرامـــــــــه
كم واحدٍ معسر بيمناك فكيـــــــت =خيرك مثل بدرٍ يسرك تمامــــه
أنت الكريم اللي بفعلك تعليــــــت =يوم الكرم خلاك نشوة هيامه

صح لسان الشاعر / محمد بن جبرين ويستاهل المدح من يزهاه / سعد بن مطلق بن فالح المليحي السبيعي وشكرا جزيلا لك على النقل واسلم وسلم والسلام .