سلام ياراع الوفا دايم السيف
ابن الملوك اللي يرفرف علمها
خالد ولد فيصل عظيم المواقيف
صقر العروبه كلها مع عجمها
فيصل سليل المجد مافيه تطفيف
من راس عود بالشجاعه حكمها
عود يطوع هامة الصعب برهيف
سيف صليبات الجماجم هشمها
غدى الطيور ام الخشوم المعاكيف
من روس شيخان اتمزع لحمها
وعشى السباع الجايعات الهواريف
فرسان قوم من ذراعه عدمها
كم من عقيد يترك اشداده امعيف
من ضرب يمن ماتزعزع قدمها
حذف الزنايج فالصحارالجفاجيف
تشبع به الضبعه ويكثر شحمها
تاخذ ليالي عندها كلها صيف
تدعي لعود بعد جوع طعمها
عبدالعزيز مشرف الحق تشريف
عينن يقدرها وعين لطمها
خلى القبايل فالجزيره مواليف
كل المشاكل بالمهند هزمها
فكو محازمهم وجوله مناكيف
امبايعين ومعلنين قسمها
واليوم في عصر ازدهار وغطاريف
في ظل حر للسعاده زعمها
عبدالله اللي كيف الوضع تكييف
اب حنونن واليتامى رحمها
غيثن ابروقه لمعاتن رفاريف
عم البلاد وللتقدم دعمها
سلطان غيثن للكبود المكاليف
غيث القلوب اللي غيابه جزمها
صاحب يمين الخير كم يعطي اضعيف
يعتق رقاب قد وصلها حطمها
سلطان ملجا من جراله تكاليف
يسلم من شرور اليالي والمها
نايف على اسمه نايفن فالمشاريف
حر عشق روس الطوال وخطمها
ثم بعدها برجع لخالد وباضيف
عند الكريم اللي فعوله رسمها
يعيش ابو فيصل عديم التواصيف
حرن مضاريبه عطيبن سهمها
يامير ياراع الكرم والمعاريف
مواقفك كل الرجال اتعلمها
اطلب شفاعه منك في وضع امخيف
حكم القصاص اللي احلومي هدمها
بشرح لك الموضوع عن كل ماطيف
شرح يفهم واحدن مافهمها
امضاربه جت بالمصايب مراديف
ماينفع النفس الشقيه ندمها
سته من الاطفال تبغى مصاريف
غير الثنين اللي افراقي سقمها
ابليس قام وكثف الشر تكثيف
كل المشاكل فوق راسي ردمها
تكفى كفاك الله جميع الصواديف انقذ اصغارن فيك ماكبر عشمها
تعيش يارع الوفا دايم السيف
ابن الملوك اللي يرفرف علمها