[خيَّال الغلباء]

جتكم وصوف المسرجات السريعات
= يالله عسى ما أقـول بالوصـف زلّـه

اللون وجه اللي غدا شمله أشتـات
= وإلاّ كما بـنّ اليمـن وسـط دلّـه

والراس حجمه معتـدل بالقياسـات
= لا صغيـر ولا كبيـر ٍ تملّـه

وآذانها ارقاقـه وملـس ٍ لطيفـات
= أقـلام منتصبـات مثـل الأخلّـه

واعيونهـا برّاقـه ومستطـيـلات
= عيـن الفتـاه اللـي لحقهـا مملّـه

والناصيه فوق العيـون الكحيـلات
= مثل السعف ومن الحـراره تضّلـه

والجبهه تشابـه ليـوم البشـارات
= تـزفّ للمحـزون فرقـا المـذلّـه

ومناخـره متباعـدات ووسيعـات
= وامـدوّرات وللنفـس سهّـل ٍ لـه

والفم واشدوقه وسـاع وطويـلات
= تحت اللجام شدوقـه ايمهـل ٍ لـه

وأعناقها ما هن عراض وقصيـرات
= طويلـة ٍ والكتـف ما لصّقـن ٍ لـه

والعرف مسترسل كما شعور خفرات
= والجذع صلب ومشرف ٍ غاربٍ لـه

واصدورها متنهّضـات ورحيبـات
= والظهر فوق الكاهـل مناسـبٍ لـه

والبطن كنز أهل الخيول الأصيلات
= رحيـب بالأنثـى وضامـر بخلّـه

واقطيّهـا متشبّعـات وعريضـات
= صلبـة قوايـم ما بهـا كـلّ علّـه

والذيل شعر الفاتنـات الجميـلات
= اللي لهـن بالقلـب عهـد وسجلّـه

هذي وصوف الخيل يا أهل البطولات
= ويالله عسى بالوصـف ما فيـه زلّـه