[خيَّال الغلباء]

بسم الله الرحمن الرحيم

قال الشاعر الشيخ / مشاري بن ربيعان رحمه الله وأسكنه فسيح جناته :-

قم سو فنجالٍ على خمسة أجناس = احـذر تـجي حرقه وبالك نياها
خلك لها عن كل عذروب حساس=قيـّس لـها الطبخة على قد ماها
حتى يجي فنجالها يجلي الأعمـاس=عقب الصلف والسهر ما أكبر غلاها
بدوا به اللـي للمعادين نطـاس=مـودع سمـان الهجـن يثلع حفاها
والثاني اللي يثني العصب بالراس =فـي ربعـةٍ يشبع بـها من نصاها
والثالث اللي يحتمـي دن الأفراس =لا روحـت خيـلٍ بـخيلٍ حماها
وباقي الملا لو ما تقهويه لا بـاس=هـذّارة المجلـس قليـل ٍ حلاها
لا نـافع ٍ ربعه ولا حاش نوماس=ضبّاط مال ولا يـذرّي ذراهـا

قال الشاعر الشيخ / مشعان بن هذال رحمه الله وأسكنه فسيح جناته :-

قم سو فنجال ٍ ترى البال منداش=لعيون من قرنه على المتن مرجود
فـي دلـة ٍ مربوبـة ٍ كنها شاش=وبـهارها مقدار خمسة عشر عود
والهيل حطه لا تداني ولو جـاش=ومن الزباد اقنع على شذرة العود
أبيه رسـم ٍ للنشاما عن اللاش=فاللاش لا فاقـد ولا هـو بمفقود
تـر لـذة الدنـيا معاميل وفراش=وصينية ٍ يركض بـها العبد مسعود
والطيب سنة والردى كنـه الطاش=واللي يريـد الجود ما هوب مردود
فـي ربعـة ٍ يقعد بـها كل هتاش=يفرح بـها اللي من دناياه مضهود
وصفرا تلوح بالضحى كـل مهبـاش=يصطي علـى قلـب المناعير بالعود
يالله طلبتك عنـد قودات الأدبـاش=إبل ٍمغاتيـر ويبـرالهن سـود
مربـاعها الصمان تبعـد عن الطاش=ومقيضهـا دخنـة ليـا صرّم العود
أبـي إليـا جانـا من المال شوباش =وتطاوحت من بين الأسلاف جلحود
مـن لا يروي شذرة السيف لا عاش=عـسى عليه مـورّد الجيب مقدود

منقول مع خالص التحية وأطيب الأمنيات وأنتم سالمون وغانمون والسلام .