[متحمس للمزاين]

السلام عليكم ورحمة الله وبركاته


انقل لكم قصيدة الشاعر الكبير / شبيب بن شاهر السبيعي في رده على مانع بن شلحاط
وهي موجوده صوتية فاليوتيوب ايضا


يقول


ابو شاهر

ياولد شلحـاط جـوك تغشـاه العسـام=والله اللي عن نواياك ومـرادك عليـم
الوكـاد انـك تبيهـا جمالـه وانتقـام=تحسب ان كل الدعاوي نعيمٍ فـي نعيـم
انطلقت بدون احاسيس واطلقت الخطام=ساقتك ماخوذة القوم في الليـل البهيـم
قمت تومي كنك اللـي ملاطفـه الهيـام=مرةً وسط العليـا ومـره فـي النسيـم
تدري ان شرواك مايستحـق الاحتـرام=شايبَ مازلت في الغي وطروقـه تهيـم
عمرك اللي قد تعدى وراء ستين عـام=والكبر عيا يردك عن الهـرج الوخيـم
لوتميز في عمار البيوت مـن الهـدام=كان ماشفناك ترزم على الهزله رزيـم
احترام اهل المواجيـب يلزمنـي لـزام=والذميـم يقـدره واحـدٍ مثلـه ذميـم
نعم بالعجمان مروين مصقول الحسـام=عزوةً ماهيب تجهل من الوقت القديـم
تكرم اللي تكسب الطيب وتفك الجهـام=الرجال اللي تخلص خصيمٍ من خصيـم
ماتمثلهـم ولاتعتبـر قــد المـهـام=المهمات العظيمه تبـي رجـلً عظيـم
وانت من بين المخاليق ماتسوى جـرام=لوتكبر في علومك وتفتل فـي البريـم
الرحى دارت وغصنك دنا منه الصـرام=لاتحسبنها سوالف علـى دانـه وريـم
كل حرٍ فوق روس الجبال الشـم حـام=وانت رح دور على اللي مقفاها ضخيم
العلوم اللي تبيهـا تراهـا عنـك شـام=ابعد من الصين عن روضة الغلبا خريم
انت ماحصلت شهره ولاجـاك اهتمـام=قلت اعارض ركب الاجواد وادور نديـم
والخطاء راعيه مهزوم لو فرفش وقـام=وانت قمت وقام يرقص لك بليس الرجيم
يوم سال السيل في الليل وردن الحيـام=وبين اللي كان خافي تحت قشع الهشيم
أسألـك بالله وابغـى الاجابـه بالتمـام=انت وش دخلك في سبيع والا في تميـم
لاتشرّه وانت مالـك حقـوق ولاكـلام=ولاانت ياشلحاط عن كل خلق الله كليـم
ماعلى السبعان يومـك تعاتبهـم مـلام=كلمةً من راس سالـم منصيهـا سليـم
ودك تثير الفتن في المبانـي والخيـام=مير مايصغي لك اللي معه عقـلً سليـم
الطمع خلاك تطمر علـى روس العـدام=مشغلً نفسك وعينك على شرهة ثليـم
الشحاذه والتطفـل سلاحـك والحـزام=ماتورع لوترجيـت مـده مـن هتيـم
المعزه ترفـع الـراس والدنيـا حطـام=نعنبو راسً على الهينـه دايـم محيـم
اعبد المعبـود لاتعبـد وجيـه الانـام=واعلم ان الرزق من رب زمزم والحطيم
وكان خشمك فيه من زايد النعمه عـرام=احمد الله واكل من نعمة الـرب الكريـم
المشاكل طق عنها مثـل طقـة دهـام=واطلب الغفران والعفو من عند الرحيـم
الهوى لاهب طير من الغصـن الحمـام=تشتكي منه اليتيمه على اخوها اليتيـم
والشعر سيفً حدب لاضرب قص العظام=ولايشد نصابـه اللـي معـه فكرًعقيـم
لاتجي نيشان من يوم كثـر الازدحـام=ولاتقوم تهز راسك مثـل راس الظليـم
العرب صاحين ماهمـب يامانـع نيـام=الكبود تزوم والصبر له لو طـال تيـم
من تعرض لـلاوادم تعرضـه السهـام=يبشر بثنتين كيه وشربـه مـن حميـم
البلد محكوم والنـاس تمشـي بالنظـام=وانت حقك جاك واصبر على حر الجحيم
مد كفك واستلمها من الـراس استـلام=تزعلك ترضيك لكن خذها في الصميـم
ادلهمت في البدايه وهلت فـي الختـام=العوج منهـا يـدل الطريـق ويستقيـم

وصح لسااااااانك يا ((سيف الغلبا ))