[سعود المسعودي]

ياسلامي على روس الرجال المجيده = عد برق المزون وعد وبل الخيالي
من هواجيس صدراً في لقاكم سعيده = اسعدالله مساكم يافهود الرجالي
جيت اشارك فرحكم جعل ربي يزيده = وبارك الله على فواز وفواز خالي
من غلاكم عنيت من الديار البعيده = ولله ان معنايه لاجل خاطر خوالي
ماعليه من اهل الهينه والمكيده = انتم اهل الفضيله والفخر والمعالي
عصر صكات بقعاء والصباح وهجيده= يوم فعل الرجل مايطلعه بالريالي
كود شذرت مصاقيل السيوف البليده = جمعنا ماتفرق الليالي ليالي
ويوم ولت مراميل الزمان الشديده = الله يجيرنا من وقت طامن وعالي
ماقصدت الحق المقباس راس الوقيده = جيت افاخر بكم في نايفات الطوالي
وانتم من البديده يوم عد البديده = وقيل من لاله اول ماتجي له توالي
والتواريخ من زمان بجره شهيده = يشهد الله لكم تاريخ مابه جدالي
مانقول العلوم الا العلوم الاكيده = والبراهين واجد ماهي قولت يقالي
والعذروالسموحه عن قصور القصيده = غير رب الملا ماحداً يجيب الكمالي
وتمت اعداد ماخطت حروف الجريده = وعد صفق الهواء وعداد حب الرمالي
وصلو وسلمو على صفاوي عبيده = الشفيع المشفع في نهار الهوالي