بسم الله والحمدلله والصلاة والسلام على رسول الله وبعد : السلام عليكم ورحمة الله وبركاته هنيئاً لهذه القبيلة الغالية وعرين الأسود أشبالها الذين لا زالو يضربون أروع الأمثلة لمجتمع قبيلتهم ذلك عند مخالطتهم أفراد قبائل الجزيره العربيه, أما أنا ومن باب الإعتراف بالحق والفضل والخوة بين رجل ورجل لأحد أبناء قبيلة سبيع ( أبو غنيم / هديهد بن غنيم السبيعي ) مركز الضبيعة الخرج فما رأيت منه إلا كل أمر جعلني أحب هذه القبيلة وأبناءها وكما قال الشاعر :-
حبيت أهل نجدن علشان بيت
= وحبيت أهل بيتن علشان مخلوق
وقبل انتقاله الضيفي إلى الخرج أهديته هذه القصيدة ومعه أخ صديق لنا ( أبو جلال ) :-
الله من قلبٍ مولع ومفتون = مولعه شقر المهار الأصايل
شقراً عليها من صفار الذهب لون = ومخالطٍ لونه بحمر النثايل
يالايمي بالخيل بالهون بالهون = لا يالسنافي كب عنك العذايل
للخيل حبٍ داخل القلب مكنون = أحبها من حبها للتخايل
رمز الشجاعه والفخر كان تدرون = أقسم بها الرحمن منشي المخايل
الخيل فيها الخير ثابت ومسنون = وصى بها محمد وديع الرسايل
ومن عرض ما جاء في المثايل يقولون = الخيل عزن للرجال وشكايل
منها كسبنا معرفة كل دندون = اعيال الرجال اللي تشيل الثقايل
خوتك يا ابن غنيم عندي بمليون =مليون رجلٍ من عيال الحمايل
أنا أشهد إنك عون من يطلب العون = راع الوفى والجود وافي خصايل
وخوتك يا سالم لها القلب ممنون = مثل الوسام اللي على الصدر شايل
منك استفدت علوم بالخيل وفنون = ونجحت والترتيب ضمن الأوائل
الطيب لأهل الطيب ثابت ومصيون = وش عاد لو الوقت بالبعد حايل
والله لو ما أذكر عوضنا التليفون = لا أشيل عفشي عقبهم والرحايل
تكفون يا أهل الخيل تكفون تكفون = لا تقطعون الوصل والشك زايل
عمر الفتى ما بين داين ومديون = بين الرجال ولا تضيع الجمايل
من عاشر الطيب رقابه عن الدون = سندبه العليا وروس الطوايل
ومن عاشر الخيب يحده على الهون = ما يسقي الضامي سراب القوايل
ويا لايمي بالخيل بالهون بالهون = هذي الفوايد شاهدة بالدلايل
وأمنيتي أن تحوز على رضاكم وأن تصل إلى أبو غنيم
أخوكم / أبو راكان العطاوي العتيبي .. القصيم
أخي الكريم / أبو راكان العطاوي العتيبي السلام عليكم ورحمة الله وبركاته وبعد : شكرا جزيلا لك على نشر البيضاء لشيخ من شيوخ قبيلة سبيع الغلباء ويستاهل أبو غنيم الشيخ / هديهد بن غنيم السبيعي وإن شاء الله تبلغه وليس ذلك بمستغرب عليكم يالعطاوي واّل هديهد أهل وفاء للصديق البعيد والقريب من غير قصور بغيرهم وجعل الله شكرك في ميزان حسناتكم يوم لا ينفع مال ولا بنون إلا من أتى الله بقلب سليم والله يعافيك ويبارك فيك ويجزاك خيرا ويبيض وجوهك يوم تبيض وجوه وتسود وجوه هذا وتقبل فائق الشكر والإمتنان مقرونا بجزيل المحبة والإحترام والله يحفظكم ويرعاكم مع خالص التحية وأطيب الأمنيات واسلم وسلم والسلام .