[خيَّال الغلباء]

بسم الله الرحمن الرحيم الرحيم

إهداء للأخ / حمد بن ناصر بن مهنا العزة السبيعي

يا راكب من عندنا فوق فكســـــار =جيب جديد توهم جايبيـــــــنـــــــه
توه من اليابان جابوه تـجـــــــــار=عبر البحر جابوه فوق السفينـــه
فكسار لند كروز عداده أصفـــــار=وزود على الميزات قوه مكـــينـه
جيب على قطع المشاوير صبـــار =فوقه شجاع بالغرض مرسلينـه
منصاك حر مكرم الضيف والجار =حراً على الطولات طالت يمينــــه
حراً على ضلع المـــراجل بنى دار =ما صك بيبانه على زابـنـيـنـــــه
تلقا الشحم والعود والبن وبهــار =وفوق على طيبه بلاجه جبينـه
سلم عليه اعداد مــا مر مــــــرار =واعداد من زار الحرم والمدينه
وعداد روج الموج في كل الأبحار =واعداد حرف بالورق كاتبـنه
هذاك أبو مهنا حمد وافي الأشبار =ياللـه يا ربي تطول سنيــنــــــه
منصى وملجى من شكى جور الأمرار=سعد الضعيف اللي طوته الغبينه
ما كنه إلا الغيث لا هل بأمطـــــار=بهجه كبود من عناها حزينـــــه
رباه عودآ للمواجيب خســـــــــــار =بالطيب والنخوه وكسب الثمينه
أبوه ناصر راعي الطيب والكـــــار=حـاش المراجل دقها والمتينــــه
ما كنه إلا سهيل في كل الأقطــــــــار=إن غاب يفقد وإن حضر حاسبينه
من لابه تاريخها جاله أخبــــــــــار =بأيمانهم فعل الوفا كاسبينــــــــه
من ربعنا العزه بعيدين الأنظــــــار =كم هاقين عن هقوته مخلفينـــه
وعلى النبي صلى عدد ساير ســار =وعداد نجمن بالسماء شايفينـه

أبيات من / هزاع السويدي السبيعـــــــــي

أخي الكريم الفاضل / الخطر السلام عليكم ورحمة الله وبركاته وبعد : شكرا جزيلا لك على نقل هذه القصيدة الجميلة والمعبرة وصح لسان الشاعر / هزاع السويدي السبيعي وسلم نبضه وبنانه وإعتلا شانه على هذه القصيدة المؤثرة والأخ / حمد بن ناصر بن مهنا العزه السبيعي يستاهل وراعي طايله وكفو فيه وفي والده الشيخ / ناصر بن مهنا قبله راع العليا والله يعافيك ويبارك فيك ويجزاك خيرا ويبيض وجهك يوم تبيض وجوه وتسود وجوه هذا وتقبل فائق الشكر والإمتنان مقرونا بجزيل المحبة والإحترام والله يحفظكم ويرعاكم مع خالص التحية وأطيب الأمنيات واسلم وسلم والسلام .