[مشاش الخيل]

يهني من هو بعارينه يسلنه ؟؟؟



يهني من هـــو بعـــارينه يســـلنه = يطرد وراهــــــا وكنه محتم التـــالي
والاســبقهــــا وهن بالدرب يقفنه = ومسجله فــوق راس الجيب ويلالي
مع شلته والمواتر جـــــالها رنه = وكلــن يهيل المــدايح دق وجــــلالي
ويشب نار المنـــاره تالي الكنه = والناس بالقيض زاد أشعالها أشعالي
حط له بشـــت(ن)ذواليقه يتلنه = له شمسة(ن)سعرها وسط البلد غالي
وحطوه بين الاشده وأكتمل فنه = وســـاقــوا عليه الــدلال بكل فنجـــالي
وكل(ن)يهايط ويحرق هيله وبنه = شيخ الكـــــرم منزله للناس مدهالي
وقدم صواني بها القعدان مستنه = وطـلـيانهــا حـــولهـــا والرز منهالي
وصاروا جدوده هل التاريخ والمنه = لاصار في البنك له دولار وريالي
وجمــع شعــاعيره ومـــواله يدنه = ومن كل شاعر يجي شيله وموالي
وصارت قناة الفضا لاجله يذيعنه = منقيــه الشيـخ (طبل) مزبن الجالي
ماهوب مثلي ديون البنك يصلنه = القســط يصلاه صليات اشهب اللالي
ياوقتــنا اللـي تقلب واعتلى شنه = والطـيب عود على سكبات الازوالي
مخـــابر الطــيب مازالت لها رنه = ومخـــابر المـــال تال الوقت تنزالي
والشك مايلحق اهل الطيب لكنه = يمرض قلوب بنت مجد(ن)على الجالي

للشاعر : صقــر الصقــر