الشاعر / عايض فرزان السبيعي يرد على قصيدة ناصر فراج الفاغوم السبيعي
هلا مرحبا برسالتاً جت على حرف آز=كتبها خبيراً قزها يمنا قزي
كتبها وفيها ولع النار هي والقاز=وبالغصب مشاها على الآز والأزي
وجتني سريعه قطر بندق على معناز=وأنا قدها في ساعة الحز واللزي
رساله معانيها ثقيله ولا تنراز=غريبه ومعلوق الحشى هزته هزي
وأنا من بعدها كن في ضامري هزاز=أفكر على مركاي لا الصبح مرتزي
بعد ما قريت حروفها داخل الجهاز=كلام الرساله حز في خاطري حزي
من اللي شرح لي عن ظروف الزمن بإيجاز=عن أهل الردأ ودروب الأنذال متوزي
يجيب الجواهر وأطيب الزل من شيراز= أهنيه وأهبي على أبليس وآخزي
عزيزاً علي ومن جدوداً علي عزاز=هل الطيب والناموس والجود والعزي
على النعم دون مجامله كل منهم حاز=بعدهم على دنيا الفنى طز ثم طزي
تقافا ضعنهم راعي النوق والمعاز= وأنا لا لقيت رسومهم قلت وآعزي
وثارت هجوسي ثورة النار وسط الغاز=ولبستها من خيرة الجوخ والبزي
على شان تبقى مثل هداج في النكاز=مع الوقت جمه يرتفع فوق وينزي
تجيني على ما ريد في وضعها الممتاز=وترتيبها كامل ولا هوب متجزي
كما صف طابوراً عطاه المدرب عاز=ينفذ الأمر ما فيه مازح ومتهزي