بسم الله الرحمن الرحيم
السلام عليكم ورحمة الله وبركاته
هذه قصيدة الشاعر ( الطيب فرصة )
^^^^^
^^^
^^
^
ليت المرض رجل(ن ) من القوم يابدور === واقف انا وياه وسط الحريبه
امــا ذبحــني وانتــهت حــزه الجــور=== والا ذبحته وانتهت هالمصيبه
مير المصيبه كن فـي داخلــي فــور === واحس في صدري هموم(ن) رهيبه
وسط العرب وعيوني تلف وتــدور === دايم وحالي فيه شك(ن) وريبه
من اول(ن) مخفيه في داخل الزور === واليوم سدي باح كل(ن) دريبه
ضيعت عمري بين راقي ودكــتور === هم السبب والطب ربي يجيبه
فــلا تزعليــن ولا تحسيــن بالبور === وانا على الدنيا ولاهي غريبه
انا من اللي لاانتهى الراي والشور === اطرب لحلات المصايب طريبه
اكسر لي جبور(ن) واجبر لي كسور === واغلب رجال ماتعرف الغليبه
والله ومــادام الليــالي لـهــا دور === لابتاع في ظل القدر واشتريبه
وان مت انا يابدور في الهم مدحور === عمانك اهل الطايله والصعيبه
هم الاساس اللي بنينا به السور === وحزامي اللي في اللقاء واعتزيبه
واللي يخليني مـن الهــم ماجــور === اني اشوفك دايما يالحبيبه
وختامها مشكــور يــارب مشكــور === الله كريم وكلنا نلتجيبه
وصلى الله وبارك على ناشر النور === محمد اللي كلنا نقتديبه