[راعي مرات]

تحياتي وتقديري للجميع ...... أتمنى أن ترتقي لذائقتكم الشعرية وأن تجد القبول لديكم:

آه.. من قلبٍ معنىً ما استـراح ******* لاهبٍ في داخل ضلوعـه يفـوح
كل ما ليل الشقـى أدلـج وراح ******** دك في الخفـاق غربـالٍ يلـوح
حظٍ أقشر لاجت الصملات طـاح ******* عجز ماحقق ولو بعض الطمـوح
والعمر اقفى ولون الشيب لاح ******* ياربيع العمر ..وقف .. لاتروح
همتي تسمو... وسدي مايباح ****** وعزمي الجبار ..للعليا لحوح
مانفعني الصبر وانـواع الكفـاح ****** مرمسات العمر زادتنـي جـروح
والمشقـى لـو تتقـى بالصيـاح ******* ماقدر ينطق ولا يقوى يبـوح
والتشكي ..والتبكـي ..والنيـاح ******* مايعدل ميلة الوقت الشحـوح
أختلط صوت الحقيقة بالنبـاح ******* واختلط جد الليالـي بالمـزوح
والنجاح إللي يسمونـه نجـاح ******* في مفاهيم العناء عندي جنـوح
جيت انآ أنشد عن الدرب البراح ******* أتساءل يابشر مـن ويـن اروح
تايهٍ محزون مكسـور الجنـاح ******* مالقيت إللي مودٍ لـي نصـوح
مركبٍ مسكين خانته الرياح ****** ومابقى للنوخذه جهد وروح
وكل داجي ليل يجـلاه الصبـاح ******* والقوافي المبهمة تبغي وضـوح
أسـأل الله دوم يرزقنـا الفـلاح ******* وارجي الرحمة من الرب السموح

عبدالرحمن عبدالله المجلي السبيعي
( راعي مرات)

****************
شكرا لمروركم سلفا
***********
الأحد 16/10/1433هـ

****

شيلة للقصيدة