غربة اوطان ومسافه والنهايـه لا نهايـه
انتهي في نفس دربي والمواجـع سرمديـه
ضايعٍ كني بلا وجهه ولا مقصـد وغايـه
غربـةٍ ماتنتوصـف بالحـروف الابجديـه
المواجع قيدتني كيـف تطلـق لـي يدايـه
اشهد ان كفوف وقتي في مواجعها سخيـه
والهنوف اللي حلاها صار بين الناس ايـه
ماكفاها قلبي اللـي سقتـه بكفـي هديـه
اسهر بليلي وهي تختـال قـدام المرايـه
كنها تشرح لهـا اسـرار فـن الجاذبيـه
كل ماقرّبـت منهـا زادت بقلبـي عنايـه
لعنبو حبٍ يوردني علـى حـوض المنيـه
غلطتي كانت جنوني يوم اعلمها الرمايـه
والنتيجه واضحه طبعاً انا صرت الضحيـه
كنها صارت على قلبي لها حق الوصايـه
تستلذ الطعن في قلبي بـلا ذنـب وخطيـه
كثر مازادت عذابي كثـر ماتظهـر غلايـه
وعزتي للي رماه الوقت في يدين حضريـه
لو بحاول واختصر في قصتي واصل الحكايه
بدوي من سوء حظه حب بنـتٍ عنجهيـه
النهايات البعيـده صـارت بعينـي بدايـه
رحلةٍ فيهـا تجـرد خافقـي قـدم البريـه
مغترب مع هم قلبـي والنهايـه لا نهايـه
والمواجع حسبـي الله كلبوهـا سرمديـه
ــــــــــــــــــــــــــــــــــــــــــــــــــ ــــــــ
صح لسانك
قصيدة رائعه
لوحه فنية جميله جدا
حياك الله اخوي في منتدى خوالك
سعداء جدا بأنضمامك
فمرحبا والله ومسهلا