الحلقه الأولى
كان مشعاب شيخ عشائر ( الصعاليك ) يسكن هو وعشيرته في مدينة عرق سبيع بالقرب من مطار الفرشة الدولي وكانت العشيرة تحب فارسهم وشيخ عشيرتهم الشيخ مشعاب وكان له اخت جميلة يقال لها عجراء اخت مشعاب
وكانت عجراء ترد على القليب وتروي القربه و تعود للبيت .
وكان اخوها مشعاب ما احد يقدر يتعرض لها بسببه لأنه جني ولا يعرف الا قطع الروس
المهم لا تواخذوني على المهايطة ( ترى هذا مسلسل لازم كذا )
وكان هناك غليم صغير وامعط ما فيه شعر لا شفته تقول هذا ضارب كيماوي ( الله يحمانا وياكم منه ) وحدة من عيونه اصغر من اختها ويسمونه سهم .
كام هالغليم وقام يترصد لطريق هالمزيونه اذا جاء على الدرب أخذ شوكه وطعزها في رجله وقعد يبكي
وبما ان عجراء اصلا رحومه وتحب البزارين افزعت له وطلعت الشوكه
عاد سهم ما صدق خبر قالها تكفين يا خوك انا ما اقدر امشي بسبب هالشوكه
لازم تشيليني وان خليتيني بيأكلني الذيب
قامت عجراء وشالته وحطته فوق غاربها وجت فازعت به يم العرب
الكارثه ان الولد صار كل يوم يتصنع افكار لجل يقابل هالبنية المزيونه
أخوها مشعاب طبعا ما يعد سهم رجال لجل كذا هو غير مهتم بوجوده على طريقها لأنه خابرها بتوطى في بطنه
المهم جت هذاك اليوم الا سهم مسوي نفسه شاعر ومصلح قصيدة حب .
يقول سهم
الحب يا عجراء ذبحني وأنا حي = ولولاك يا عجراء تركت العشيرة
ضميان وانتي يا بعد روحي المي = عيني بصيره مير يدّي قصيرة
وشفايفك عندي حلاها بعد شي = وملمس رقيق ولك يدين شطيره
(يدين شطيره) يشير الشاعر إلى انها قد شالته بيديها .
قامت عجراء يوم اسمعت قصيدته وهي تحط القربه وهي توطى في بطنه لين خلته طايح متسلقي
ويقول جعلك يا عجراء تطيحين في حب رجال ما تقدرين تأخذينه
انتهت الحلقه ألولى