هذه القصيدة بمناسبة زيارة محافظ محافظة رنية ومرافقيه من رؤساء الدوائر الحكومية إلى مركز العويلة لتفقد احتياجاته في يوم الأحد الموافق 4/3/1427هـ
هلا يا مرحبا باسم العويله شاسعة الأطراف = بلد توه حديث وتكبر حدوده الإدارية
تزيد أعداد سكانه يتبع له هجر وأرياف = ويحتاج المزيد من الخدمات الضرورية
وأنا واقف هنا أمثل قبائل في هذا الميقاف = أرحب بالمحافظ والرجال أهل الشهامية
سعدنا بالزيارة والزيارة سامية الأهداف = تشوفون القرايا حسب حالتها الطبيعية
هل الطاولات وعيال الحمايل فعلهم ينشاف = نعم وأبو فهد من روس قوم نارهم حية
نبي جهد يقدم وأنت منك متابعة وإشراف = ولا يكفي عن جهود الزراعة والبلدية
بلدنا ناقصة طرق تعبد وأرصفة وأكتاف = مازالت داخل الحارة شوارعنا ترابية
وصلنا خط واحد ثم وقف ظلم وخطاء وإجحاف = وقف وإنا من أول موعدين بالازدواجية
كذلك مركز الشرطة وجوده ما عليه خلاف = طلبنا وآخرتها ما حصل لو جيب دورية
وجود الأمن لإثبات الحقوق ويعطي الإنصاف = هذا مبدأ قيادتنا ودولتنا السعودية
ومدارسنا اليا جاء للسيول من الحجاز وإرجاف = بلشنا نقطع الوديان في الروحة وفي الجية
لو المسئول له طالب هنا يدرس علينا خاف = ودري إنا ما نبي يا كود فصل من الثانوية
ليا شفنا المطر والسيل قلنا يالله الرواف = وسبايب خوفنا من وادي ما تم كبرية
بني وأصبح مثل بيض الصعو يطري ولا ينشاف = هذا ما هو بكبري مير لا هاذي ولا نية
حقيقة لازم أسبح في كلامي واضح وشفاف = لأنه صار مطلوب الصراحة والشفافية
ولا نخيفكم بحاجة دفاع ومركز اسعاف = يباشر في الحوادث كل حالات خطورية
حوادث سهلة وصارت تسبب في ضرر وإتلاف = لإنا نكافح النيران بالطرق البدائية
ولا ننسى الدعاة ومكتب الإرشاد والاوقاف = ضروري يأهل الدعوة نشاطات دعوية
لأن العمل نور يكشف الظلمة كما الكشاف = ينير الدرب قدمي لأطي الحية برجلية
حكومتنا الرشيدة خيرها أضعاف وراه أضعاف = هدفها ينعمون الشعب في خير ورفاهية
على نهضة بلدهم ينفقون المال بالآلاف = ويا ما عمروا به من مشاريع حضارية
وأبو متعب ملكنا طال عمره كامل الأوصاف = زعيم ما وجد في الأرض لا مثله ولا زية
جمل زومان شيال الثقايل ما يشيل خفاف = فقارى الناس تصبح بعد مداته غناوية
رحوم للصغير وللضعيف ومصخر ميلاف = ويضرب روس الأعداء بالمخلايب الحديدية
مسح بيديه دمعات العيون ودمعها ذراف = ويحيى للعروبة والجماهير العربية
الشاعر / ماضي بن محمد بن ماضي السبيعي